Gennadıı Golovkın álemniń úzdik 10 boksshysynyń qatarynan kórindi

NUR-SULTAN. QazAqparat - Business Insider basty úsh krıterııdi negizge ala otyryp qazirgi zamannyń úzdik 15 boksshysynyń tizimin jarııalady, dep habarlaıdy QazAqparat.

53 jeńis (36 nokaýt), bir jeńilis jáne eki teń nátıjemen Saýl «Kanelo» Alvares álemniń úzdik boksshylarynyń kóshin bastap tur.

Ýkraınalyq Vasılıı Lomachenko ekinshi orynǵa jaıǵasqan. Ol 14 jeńis (10 nokaýt) jáne bir jeńilis ıesi.

Úshinshi oryndy asa aýyr salmaqtaǵy jeńilmegen Ýkraına boksshysy Aleksandr Ýsık ıelenip tur. Ol 17 ret jeńiske jetken (13 nokaýt).

Qazaqstan boksynyń juldyzy, orta salmaqtaǵy IBF jáne IBO nusqalary boıynsha Álem chempıony Gennadıı Golovkın 9-orynǵa jaıǵasty. Onyń qorjynynda 40 jeńis (35 nokaýt), bir jeńilis jáne bir teń nátıje bar. «Big Drama Show» sózimen tanylǵan sportshy reıtıngtegi qurmetti orynǵa beker jaıǵasqan joq.

Esterińizge sala keteıik, Golovkın áýelde áýesqoı boksshy retinde shyǵyp, 2003 jylǵy Álem chempıonatynda altyn medal, al 2004 jylǵy Olımpıada oıyndarynda «kúmis» alǵan.

Birneshe jyldan keıin ol kásipqoı boksqa aýysyp, tórt jyldan soń álemniń ýaqytsha chempıony degen alǵashqy ataǵyn jeńip aldy. Soqqysynyń qýatty bolýy arqasynda ol talantty boksshyǵa aınaldy.

2017 jyly Kaneloǵa qarsy jekpe-jektegi teń nátıje men revansh kezindegi jeńilisi - Golovkın mansabyndaǵy daýly sátter.

Aıta keteıik, Gennadıı ýkraınalyq boksshy Sergeı Derevıanchenkomen bolǵan sońǵy kezdesýinde orta salmaqtaǵy Álem chempıony belbeýin qaıtaryp aldy.