Gennadıı Golovkın 2028 jylǵy Olımpıada oıyndarynyń uıymdastyrý komıtetine bardy
ASTANA. KAZINFORM - Qazaqstannyń Ulttyq Olımpıadalyq komıtetiniń prezıdenti Gennadıı Golovkın jumys saparymen Los-Andjelestegi (AQSh) 2028 jylǵy Olımpıada oıyndarynyń uıymdastyrý komıtetine bardy. Bul týraly QR UOK málimdedi.
Kezdesý aıasynda Oıyndarǵa qatysatyn sportshylarǵa jasalatyn jaǵdaılar, sonymen birge Qazaqstan men AQSh arasyndaǵy sport salasy boıynsha yntymaqtastyq múmkindikteri talqylandy.
Naqtyraq aıtqanda, olımpıadalyq ınfraqurylym jáne uıymdastyrý komıteti sportshylarǵa usynyp otyrǵan jaǵdaılar taqyrybyna nazar aýdaryldy. Qazaqstan UOK basshysy aldaǵy Olımpıada oıyndary tarıhtaǵy mańyzdy kezeń bolatynyna jáne halyqaralyq sporttyq baılanystardy nyǵaıtýǵa septigin tıgizetinine senim bildirdi.
«Los-Andjelestegi Olımpıada oıyndaryn uıymdastyrý komıtetine ýaqyt bólip, mýltısporttyq oqıǵany ótkizýge qatysty ózekti ári mazmundy aqparat usynǵanyna alǵys bildiremiz. Uıymdastyrý komıtetine kelgenimiz bizdiń nátıjeli yntymaqtastyq ornatýǵa daıyn ekenimizdi bildiredi», - dedi Gennadıı Golovkın.
Aldaǵy Olımpıada oıyndarynyń Uıymdastyrý komıteti Qazaqstan delegatsııasyna jarystar kezinde qoldanylatyn basty ınfraqurylym nysandaryn, onyń ishinde Olımpıada aýyly men sporttyq arenalardy kórsetti.
2028 jylǵy Los-Andjelestegi Olımpıada oıyndarynyń ókilderi iri sporttyq sharalardy uıymdastyrýdaǵy tájirıbesin bólisip, bul protsesske engizilgen ınnovatsııalarǵa nazar aýdardy.
Qazaqstan Ulttyq Olımpıada komıteti aldaǵy Olımpıadanyń uıymdastyrý komıtetimen yntymaqtastyqty jalǵastyrady.
Aıta keteıik, Golovkın Qazaqstan boksshylaryn Azııa chempıonatyna daıyndaý úshin óziniń bapkerin shaqyrǵan bolatyn.
