Gennadıı Golovkın 2024 jylǵy Olımpıada oıyndary aıasynda birqatar mańyzdy kezdesý ótkizdi
ASTANA. KAZINFORM – Qazaqstan Ulttyq Olımpıadalyq komıtetiniń prezıdenti Gennadıı Golovkın Parıj-2024 Olımpıada aıasynda mańyzdy kezdesýler ótkizdi, - dep habarlaıdy Olympic.kz.
Qazaqstan UOK basshysy atalǵan qyzmetke saılanǵan boıda halyqaralyq baǵyttaǵy jumysty jetildirýge basymdyq beriletinin aıtqan bolatyn. Parıjdegi jazǵy oıyndar barysynda da ol bul baǵyttaǵy jumysyn jalǵastyrýda. Kezdesýler aıasynda elimizdegi olımpıadalyq sport túrlerin damytý, Olımpıadalyq qozǵalystyń tutastyǵy jáne Qazaqstanda iri sporttyq is-sharalardy ótkizý múmkindigi jaıly máseleler sóz boldy.
Atap aıtar bolsaq, Golovkın Birikken kúres áleminiń (United World Wrestling) prezıdenti, HOK múshesi ári HOK atqarýshy komıtetiniń vıtse-prezıdenti Nenad Lalovıchpen kezdesti.
Fýnktsıonerler Parıjdegi Olımpıada oıyndary men Qazaqstandaǵy kúresti damytý joldaryn talqylady. Golovkın men Lalovıch qazaqstandyq balýandardy halyqaralyq arenada qoldaý strategııasyn egjeı-tegjeıli saraptap, Qazaqstanda iri kúres týrnırlerin uıymdastyrý máselesine toqtaldy.
Halyqaralyq sadaq atý federatsııasynyń prezıdenti, HOK múshesi ári Túrkııa UOK prezıdenti Ýgýr Erdenermen ótken kezdesýde elimizdegi sadaq atý sportyn damytý jáne eki el UOK-teriniń arasyndaǵy ekijaqty áriptestikti nyǵaıtý joldary talqylandy.
HOK vıtse-prezıdenti ári HOK Atqarýshy komıtetiniń múshesi Hýan Antonıo Samaranch jáne HOK sporttyq dırektory Kıt Makkonelmen ótken júzdesýler barysynda Qazaqstannyń olımpıadalyq sport túrlerin damytýǵa, olımpıadalyq qozǵalystyń tutastyǵyn saqtaýǵa úles qosýy, sondaı-aq, halyqaralyq sporttyq uıymdarmen áriptestikti ári qaraı kúsheıtý máseleleri sóz boldy.
HOK vıtse-prezıdenti ári HOK Qarjylyq komıssııasynyń jetekshisi Ser Mıang myrzamen ótken kezdesý kezinde halyqaralyq sporttyq seriktestikti nyǵaıtý, sportty qoldaýǵa arnalǵan qarjy quraldaryn damytý jáne sportshylardyń múmkindigin keńeıtý máseleleri áńgime arqaýyna aınaldy. Odan bólek, HOK bastamasymen kıbersportty damytý baǵyttary talqylandy.
Sonymen qatar, kezdesý barysynda 2024 jyldyń 8 qyrkúıeginde Delıde (Úndistan) ótetin AOK bas assambleıasynyń saılaýy jaıly da sóz qozǵaldy. Azııa Olımpıada Keńesiniń qazirgi prezıdenti Randjır Sıngh jáne AOK bas dırektory ári halyqaralyq sý sporty túrleri federatsııasynyń prezıdenti Hýsseın Ál-Mýssalammen ótken basqosýlarda da osy máseleler áńgimege ózegine aınaldy.
Olympism365 Komıssııasynyń tóraǵasy ári HOK múshesi Aývıta Rapıllamen ótken júzdesýde Golovkın HOK qyzmetin, Tomas Bahtyń Gennadıı Golovkındi Olympism365 komıssııasynyń múshesi etip taǵaıyndaýyn, Komıssııa qyzmeti men onyń jetistikterin jáne maqsattaryn talqylady.
Sondaı-aq, 2024 jyldyń qarashasynda ótetin Olympism365 Komıssııasynyń otyrysyna Golovkınniń alǵash ret qatysýy da kún tártibine engizildi. Atalǵan kezdesýge Olympism365 baǵyty boıynsha HOK departamentiniń dırektory Ollı Dadfıld pen Komıssııanyń qazirgi músheleri de qatysty.
Aıta ketelik, Golovkınniń Parıjdegi Olympism365 Komıssııasyna qatysýy aıasynda taǵy birqatar kezdesýler ótti.
Parıj Olımpıadasynda Gennadıı Golovkın Azııa aımaǵyndaǵy sportty damytý máselelerin talqylady. Atalǵan taqyryp Saýd Arabııa UOK basshysy, hanzada Abdýl-Azız ıbn Abdalla Ál Saýdpen kezdesý barysynda kóterildi. Taraptar Parıjdegi Olımpıada oıyndary jaıly sóz qozǵap, kıbersportty damytý múmkindikterin, birlesken sporttyq jarystardy uıymdastyrý jáne Qazaqstan men Azııa aımaǵy elderiniń sporttaǵy ara-qatynasyn nyǵaıtý máselelerin kóterdi.
«Búginge deıin Gennadıı Gennadevıch basqa memleketterdiń UOK basshylary, halyqaralyq federatsııa basshylary men HOK múshelerin qosa eseptegende, 25-ten asa kezdesý ótkizip úlgerdi. UOK jańa basshylyǵy uıymnyń aldyndaǵy basty mindet - halyqaralyq baǵyttaǵy áriptestikti nyǵaıtý ekenin áý bastan aıtqan bolatyn. Olımpıada oıyndary aıasynda biz osyǵan yqpal etken kezdesýlerdi ótkize aldyq. Bizdiń Olımpıada oıyndarynda ekenimizdi jáne jarys kestesiniń tyǵyzdyǵyn eskersek, UOK prezıdentiniń jumys kestesinde áýel bastan úzilis bolǵan joq. Resmı kezdesýler Olımpıadanyń sońǵy jarys kúnine deıin jalǵasa bermek», - deıdi halyqaralyq baǵyttar boıynsha departament basshysy Anar Syzdyqova.
Atalǵan kezdesýler halyqaralyq baǵyttaǵy áriptestik pen sporttyq baılanysty nyǵaıtýdyń, sondaı-aq, qazaqstandyq sportty elimizde jáne jaqyn bolashaqta álemdik arenada damytý úshin halyqaralyq sporttyq qaýymdastyqtardyń belsendi ókilderimen dıalog júrgizýdiń mańyzdylyǵyn aıqyndaıdy.
