General Jeksenbaevty qalaı ulyqtasaq ta jarasady - baspasózge sholý
***
«Egemen Qazaqstan» gazetinde «Tótenshe jaǵdaıdan zardap shekkenderge kómek kórsetiledi» degen taqyryppen jaryq kórgen maqalada depýtattardyń sý tasqynynan zardap shekkenderge bir kúndik jalaqysyn kómek retinde aýdaratyny jazylǵan. Naqtyraq, aıtqanda, keshe palata Spıkeri Qabıbolla Jaqypovtyń tóraǵalyǵymen ótken jalpy otyrysta Májilis depýtaty Tólegen Ibraev kúnniń kúrt jylynýynan sý astynda qalyp, aýyr zardap shekken azamattar men olardyń otbasylaryna kómek kórsetý týraly áriptesterine úndeý joldady. - Elbasymyz N.Á.Nazarbaevtyń tapsyrmasy boıynsha, zardap shekken azamattardyń otbasyna, el-jurtqa keń kólemde, tolyqtaı kómek kórsetilýde, Úkimet tarapynan áli de qomaqty qoldaý bolary sózsiz. Áıtse de, osyndaı jaǵdaıda turmysyna aýyrlyq túsip, qınalǵan adamdarǵa der kezinde qolushyn berý, el bolyp, jurt bolyp kómek berý ata sal¬tymyz, qanǵa sińgen ádetimiz. Qara jamylyp, qaıǵy basqan, qazaly otbastaryna shyn júrekten kóńil aıtamyz, - deı kelip, T.Ibraev áriptesterinen bir kúndik eńbekaqy-laryn kómek retinde bólýdi surady. Depýtat usynysy biraýyzdan qoldaý taýyp, Májilis depýtattary men apparat qyzmetkerleriniń bir kúndik tabysy tabıǵı apattan zardap shekkenderdiń esepshotyna aýdarylatyn boldy, dep jazady «Egemen Qazaqstan».
Atalǵan basylymnyń taǵy bir maqalasynda Qyrǵyzstan Jeńis kúniniń resmı nyshany retinde ádettegi Georgıı lentasyn paıdalanýdan bas tartýǵa sheshim qabyldaǵany týraly aıtylady. Gazettiń jazýynsha, munyń ornyna respýblıkada memlekettik týdyń túsindeı alqyzyl jáne sary tústi lentalar taǵylady. Aldymen Bishkek qalasynyń meri osyndaı uıǵarym jasady. Sońynan onyń úlgisin basqalar da aldy. Sóıtip, búkil respýblıka osyndaı nyshandarmen shyǵatyn boldy. Alaıda, buǵan memlekettik deńgeıde eshqandaı baǵa da, túsindirme de berilmedi. «Georgıı lentasyn taǵýǵa eshqandaı da tyıym salynǵan joq, olaı bolýy múmkin de emes, - dep aqtalýǵa asyqty qala ákimdigindegiler biraq. - Georgıı lentasyn, bálkim, jurt qoldanatyn da shyǵar, óıtkeni, oǵan úırenip te qaldy ǵoı. Biraq merekeniń resmı túsi bizde alqyzyl jáne sary tústi bolady. Biz budan eshqandaı qarama-qaıshylyq kórip turǵan joqpyz» - dep málimdedi Qyrǵyzstan parlamentiniń spıkeri Asylbek Jeenbekov. Alaıda, «tústi aýystyrý» máselesin jurt barlyq jerde birdeı qabyldap jatqan joq. Ol qoǵamda ártúrli pikirtalastar týǵyzdy. Birinshiden, respýblıka turǵyndarynyń birazy Georgıı lentasyn baıaǵydan beri Uly Otan soǵysynyńdaǵy Jeńistiń sımvoly retinde sanaıdy. Sondyqtan, buǵan endi kelip saıasatty aralastyrýdyń qajeti joq deıdi. Olar nyshan túsin aýystyrýdy tarıhı jad pen ádildikke jasalǵan qııanat, satqyndyq dep esepteıdi. Ondaılardyń qatarynda parlament depýtaty Omýrbek Tekebaev ta bar. Ol Bishkek bıliginiń nyshan belgisin aýystyrýyn «aqymaqtyq, sandyraq jáne arandatý» dep baǵalaıdy. «Biz Uly Otan soǵysynyń qalaı ótkenin, ondaǵy aýyr jeńistiń qalaı jáne kimderdiń, qandaı erliktiń arqasynda kelgenin umytqan joqpyz. Georgıı lentasy sol soǵysta bizdi bir lagerdiń astyna toptastyrdy. Sonyń negizinde ortaq jeńiske jettik. Ol bolmaǵanda, qazirgi kúnimizdiń ne bolaryn kim bilsin. Men munyń bárin aqymaqtyq, ótken kúndi, bizdiń ótken tarıhymyzdy syzyp tastaýǵa degen jantalas dep qana bilemin», - dedi ol. Maqala «Qyrǵyzstan Jeńis merekesine óz nyshanyn belgilep otyr» degen taqyryppen berilgen.
*** Qazaqtan eki birdeı general shyqty, onyń biri - Sabyr Rahymov bolsa, ekinshisi - Shákir Jeksenbaev, dep jazady «Aıqyn» gazeti. Maqala «General Jeksenbaevty qalaı ulyqtasaq ta jarasady» degen taqyryppen jaryqqa shyqqan.
«Shákir Jeksenbaev general ataǵyn Sabyr Rahymovtan jeti aı keıin alǵanymen, ekiniń biriniń qoly jete bermeıtin tehnıkalyq áskerdiń ishindegi hımııalyq qyzmetti atqarǵan. Ári Jeksenbaevtyń myqtylyǵy, maıdan shtabynyń quramyna engen bas qolbasshylarmen bolǵan armııa generaldarymen, marshal sııaqty iri áskerı shendi adamdarmen qatar qyzmet atqardy. Generaldyń erligi týraly baspasóz betterinde talaı jazyldy da. Tipti Jeksenbaevtyń óziniń «I gorek dym voıny» degen orys tilindegi kitaby da jaryq kórgen. Ókinishtisi sol, ult batyrynyń eren erligin pash etetin dúnıeler neken-saıaq. Batyrdyń esimi Batys Qazaqstan oblysyndaǵy kishigirim aýyldyń kósheleri men mektepke berilgeni bolmasa, respýblıkalyq deńgeıde ulyqtala qoıǵan joq», delingen maqalada.
Sonymen qatar, «Aıqynnyń» búgingi sanynda Ekinshi dúnıejúzilik soǵys taqyrybynda «Ekinshi maıdan nege kesh ashyldy?» degen maqala bar. Onda tilshi: «Keńestik tarıhty jazǵandardyń barlyǵy «uzaqqa sozylǵan soǵystan kúızelgen KSRO uly derjava mártebesin joǵaltýy úshin aǵylshyn-amerıkalyq koalıtsııa Ekinshi maıdandy ashý merzimin qasaqana kesheýildetti» degen pikirde boldy. Bul da qısy¬ny bar áńgime. Soǵystaǵy sheshýshi kezeń ótip, maıdandarda KSRO-nyń «jeńimpaz» degen mártebesi anyqtalǵannan keıin de odaq¬tastar Ekinshi maıdandy ashýǵa asyqpady. Ulybrıtanııa men AQSh-tyń áliptiń artyn baǵyp, syrt-tan baqylap otyrýy bir ǵana nárseni ańǵartady: odaqtastar Germanııanyń da, KSRO-nyń da álsirep, tıtyqtaýyna múddeli boldy», dep óz paımyn ortaǵa salady.
*** «Ekspress-K» gazetiniń jazýynsha, Qazaqstan Garvard bıznes mektebiniń ǵalymdary jasaǵan zertteý nátıjesinde áleýmettik progress ındeksi boıynsha 83-orynǵa turaqtaǵan. Maqala «Mıster ı mıss Kongenıalnost» degen taqyryppen berilip otyr. Basylymnyń atap ótýinshe, reıtıng boıynsha birinshi orynda Norvegııa, al tizimniń eń sońynda Ortalyq Afrıka respýblıkasy ornalasqan. Bizdiń elimiz tizimniń orta sheninde Gondýras pen Kýbanyń arasynan oryn alǵan. al joǵary bilimge qoljetimdilik reıtıngisi boıynsha Qazaqstan úzdik otyzdyqqa enip otyr. Alaıda, azamartardyń densaýlyǵy boıynsha 133 eldiń eń sońyna qalyp qoıypty.
