General Sabyr Raqymov týraly kórkem fılm túsirý qajet - Álı Bektaev
ASTANA. QazAqparat - Búgin QR Parlamenti Senatynyń jalpy otyrysynda senator Álı Bektaev Keńes Odaǵynyń Batyry Sabyr Raqymovtyń erligine arnap kórkem fılm túsirý kerektigin aıtty, dep habarlaıdy QazAqparat.
«Keńes Odaǵynyń Batyry, Ortalyq Azııadan shyqqan alǵashqy generaldardyń biri Sabyr Raqymovtyń erligin eldiń esinde qaldyrý maqsatynda, jastardyń boıynda patrıottyq qasıetterdi damytý baǵytynda osy batyr aǵa týraly arnaıy kórkem fılm túsirýge qarajat bóldirýdi suraımyn», - dedi depýtat QR Premer-Mınıstri Baqytjan Saǵyntaevqa joldaǵan saýalynda.
Osyǵan deıin Májilis depýtattary general S.Raqymovtyń jádigerlerin elge qaıtaryp, Astanada eskertkishin ornatý máselesin kótergen bolatyn.
Stalınniń ózi «temir general» dep moıyndaǵan Sabyr Raqymov 1902 jyly Ońtústik Qazaqstan oblysy Qazyǵurt aýdanynda dúnıege kelgen. Ol 1945 jyldyń naýryz aıynyń 26 kúni maıdan dalasynda qaza tapqan edi.
