«General Motors» taǵy 100 myńnan astam kóligin keri qaıtaratynyn málim etti
ASTANA. QazAqparat - Amerıkalyq «General Motors» korporatsııasy juma kúni túrli aqaýlardyń anyqtalýyna baılanysty AQSh naryǵynan kólikterin kezekti keri qaıtaryp alatyny týraly jarııalady, dep habarlady ITAR-TASS.
Bul jolǵy servıstik aktsııaǵa 36 myńǵa jýyq 2012 jylǵy úlgidegi Buick Verano, Chevrolet Cruze, Chevrolet Sonic jeńil kólikteri men Chevrolet Camaro sport kólikteri ilikti. Óndirýshiniń aıtýynsha, jol-kólik oqıǵasy oryn alǵan jaǵdaıda bul kólikterdiń qaýipsizdik jastyqtary ashylmaýy múmkin. GM ókilderiniń pikirinshe, qazirge deıin osyndaı jaǵdaıdan bir adam zardap shekken.
Budan basqa, 70 myńǵa jýyq Chevrolet Tahoe, Chevrolet Suburban, GMC Yukon jańa jol talǵamaıtyn kólikteri men Chevrolet Silverado, GMC Sierra jańa pıkaptar keri qaıtarylady. Bul kólikterdiń esigi ashyq qalǵany nemese qaýipsizdik beldigi taǵylmaǵany týraly eskertetin dybystyq belgileri jumys istemeýi múmkin. Aıta keteıik, osy jyldyń basynda GM aınalasynda daý-damaı kóbeıip ketti. Aqpan, naýryz aılarynda kontsern búkil álem boıynsha kompanııa qyzmetkerlerine 2001 jyly anyqtalǵan ot aldyrý júıesinde aqaýy bar 2,5 mln. jeńil kólikterdi keri qaıtarýdy sheshken. Bul aqaý kólik júrgen kezde qozǵaltqyshtyń sónip qalýyna ákelgen. Tejegish júıesinde irkilis týdyryp, qaýipsizdik qurylǵysyn óshirip tastaǵan. Osyndaı aqaýlyqtyń saldarynan keminde 13 adam kóz jumǵan. Mamyrdyń ortasynda kontsern AQSh-tyń tas joldarynda qozǵalys qaýipsizdigi basqarmasyna aqaýy týraly aqparatty ýaqtyly bermegeni úshin 35 mln. dollar mólsherinde aıyppul tóleýge kelisken. Kompanııa ókilderi retteýishke belgilengen bes kúndik merzimde problema jaıynda habardar etpegenin moıyndady. Jyl basynan beri GM 15,9 mln. astam kólikti keri qaıtaryp úlgerdi. Sarapshylar atap ótkendeı, iri amerıkalyq avtoóndirýshi jylyna keri qaıtarylǵan kólik sany boıynsha 2004 jylǵy óz rekordynan asyp tústi. Ol kezde kontsern 10, 75 mln. kóligin keri qaıtarǵan edi.
