General-maıor Seıilbek Altynbekov dúnıeden ozdy

ASTANA. KAZINFORM — QR Qarýly kúshteri Bas shtabynyń alǵashqy bastyǵy Seıilbek Altynbekov ómirden ótti.

Seıilbek Altynbekuly 1944 jyly 15 maýsymda Qyzylorda oblysy Syrdarııa aýdany Kırov kolhozynda dúnıege kelgen. Mektepti bitirgennen keıin Seıilbek áskerı joldy tańdap, Tashkent jalpyáskerı komandalyq ýchılışesinde kásiptik bilim aldy. Frýnze atyndaǵy Áskerı akademııada oqydy. Áskerı ýchılışe kýrsantynan shtab bastyǵy — Qazaqstan Qorǵanys mınıstriniń birinshi orynbasaryna deıingi joldan ótti.

Seıilbek Altynbekov Qarýly kúshterdi qalyptastyrý jáne eldiń qorǵanys qabiletin nyǵaıtý isine kóp eńbek sińirdi. 1992 jyldyń qazanynan 1993 jyldyń jeltoqsanyna deıin Respýblıkalyq ulannyń qolbasshysy bolyp, eldiń joǵary basshylyǵy men negizgi memlekettik organdardyń jeke kúzeti qyzmetine basshylyq jasady. Keıin Qorǵanys mınıstrligi men Tótenshe jaǵdaılar jónindegi memlekettik komıtette jaýapty laýazymdarda qyzmet etti.

Seıilbek Altynbekuly II dárejeli «Danq», «Qyzyl juldyz» ordenderimen jáne kóptegen medalmen marapattalǵan.

Aıta ketsek, general-maıor ótken jyly 80 jas mereıtoıyn atap ótken edi. Aıtýly dataǵa oraı Qorǵanys mınıstri qarýly kúshterdiń qurylysyna qosqan úlesi jáne jastarǵa áskerı-patrıottyq tárbıe berýdegi zor eńbegi úshin alǵys bildirip, Seıilbek Altynbekulyna «El qorǵany» medalin tabys etti.

Qazaqstan Respýblıkasy Memlekettik kúzet qyzmetiniń basshylyǵy men jeke quramy general-maıor Altynbekov Seıilbek Altynbekulynyń dúnıeden ozýyna baılanysty týǵan-týystaryna jáne jaqyndaryna kóńil aıtady.

Buǵan deıin Belgili ǵalym Seıit Qasqabasov ómirden ótkenin jazǵan edik.