General-maıor Serik Borambaev: syrttan tónetin qaýip-qaterlerge árqashan ázir bolýymyz kerek

NUR-SULTAN. QazAqparat - Prezıdent Qazaqstan halqyna Joldaýynda memlekettiń qorǵanys-ónerkásip kesheni men Áskerı doktrınasyn qaıta qaraýdy tapsyrdy. Sondaı-aq Qarýly Kúshterdiń syrttan tónetin qaýip-qaterlerge árqashan ázir bolýy kerektigin atap kórsetti, deıdi QR Qarýly Kúshteri Bas shtab bastyǵynyń orynbasary – Tárbıe jáne ıdeologııalyq jumystar departamentiniń bastyǵy general-maıor Serik Borambaev.

Bas shtab bastyǵy orynbasarynyń aıtýynsha, memlekettik apparatta osyǵan qatysty is-qımyldyń pysyqtalǵan jospary bolýy shart.

Bundaı jaǵdaıda Qarýly Kúshter árdaıym sońǵy qoldaný quraly bolyp tabylady. «Sondyqtan syrttan tónetin qaýipti modeldeý kezinde biz oqıǵalardy damytýdyń barynsha jaǵymsyz nusqalarynyń stsenarıılerin pysyqtaımyz», - deıdi ol.

«Áskerı qaýipsizdikti qamtamasyz etý máselelerinde jańa óńirlik jáne jahandyq syn-tegeýrinder men qaýip-qaterlerdiń oryn alýyn eskerip, vedomstvoaralyq tásildi qoldaný ózekti bolyp otyr.

Qorǵanys mınıstrligi barlyq memlekettik organdarmen ózara is-áreket jasaý arqyly, áskerı qaterlerdiń órshýi jáne soǵys jaǵdaıy engizilgen kezde, memleket qyzmetin josparlaýdy júzege asyrady.

Qazirgi ýaqytta birlesken áskerı oqý-jattyǵýlardy ótkizý josparlanyp otyr. Jaǵdaıdyń kenetten ózgerýine qatysty máseleler de pysyqtalady. Bul rette Aýǵanstandaǵy jaǵdaıdyń shıelenisýine baılanysty qaýip-qaterler de negizge alynady.

Jańa Áskerı doktrınada bıýdjettiń múmkindikteri men otandyq ekonomıkanyń áleýetine tónýi múmkin qaterler eskeriledi. Osylarǵa súıenip, jalpy memlekettik qorǵanys saıasatynyń naqty saıası baǵdarlary qalyptasady».