General Dýstýmnyń Aýǵanstanǵa oralýy: Kabýl áýejaıynda jarylys boldy
ASTANA. QazAqparat - Jeksenbi kúni Kabýl áýejaıyna jaqyn jerde joıqyn jarylys boldy. Jarylys Aýǵanstannyń birinshi vıtse-prezıdenti Abdýl Rashıd Dýstým áýejaıdan shyqqannan keıin birshama ýaqyttan soń jasaldy, dep habarlaıdy TASS Agence France-Presse saıtyna silteme jasap.
Qýatty jarylys áýejaı mańynda Dýstýmnyń jaqtastary jınalyp turǵan jerde boldy. Al 2017 jyly Túrkııaǵa qashyp ketken sheneýniktiń ózi zardap shekken joq.
«Shabýyldy jankeshti-lańkes jasaýy múmkin», - dep málim etti agenttikke Aýǵanstan Іshki ister mınıstrliginiń baspasóz hatshysy.
Aýǵanstannyń TOLOnews telearnasynyń jergilikti sheneýnikterge silteme jasap habarlaýynsha, ajal qushqandardyń deni - qaýipsizdik kúshteriniń qyzmetkerleri.
Aýǵanstannyń birinshi vıtse-prezıdenti Abdýl Rashıd Dýstým mingen aıyrý belgileri joq charterlik reıs jeksenbi kúni saǵat 16.30-da (Astana ýaqytymen 18.00) Hamıd Karzaı atyndaǵy Halyqaralyq áýejaıǵa qonǵan bolatyn. Júzdegen adam, sonyń ishinde joǵary laýazymdy tulǵalar Túrkııada 14 aı bolyp kelgen vıtse-prezıdentti qarsy alý úshin ushyp-qoný jolaǵyna jınalǵan edi.
