General Beket Aımaǵambetov: Qyzmetkerlerdi yntalandyrýǵa basymdyq berilý tıis

QOSTANAI. QazAqparat – Qostanaıda patrýldik polıtsııa jasaqtarynyń garnızondyq jıyny ótti. Qostanaı oblysy polıtsııa bastyǵy, general Beket Aımaǵambetov jeke quram aldynda sóılegen sózinde ishki ister organdaryn reformalaý jáne «Halyq únine qulaq asatyn memleket» qaǵıdatyn iske asyrý jónindegi mindetterdi atap ótti, dep habarlaıdy QazAqparat tilshisi.

Tuńǵysh Prezıdent kúnin merekeleý qarsańynda ótken jıynda Beket Aımaǵambetov polıtsııanyń bir jyl boıy atqarǵan jumysyna toqtaldy.

«Aldymen barlyq qyzmetkerlerdi kele jatqan merekemen quttyqtap, densaýlyq pen jumysta joǵary kórsetkishterge qol jetkizýdi tileımin. Patrýldik polıtsııa jumysynyń mańyzdy kórsetkishteriniń biri azamattarǵa kómek kórsetý jáne qylmystardy izin sýytpaı ashý, sol úshin halyqtyń alǵysyna bólený. Búginde kóshelerde jáne qoǵamdyq oryndarda jaıaý patrýldeýge nazar aýdaryldy. Jasalǵan quqyq buzýshylyqtarǵa jedel den qoıýdyń arqasynda qylmystyń aıtarlyqtaı tómendegeni baıqalady. Osy jyldyń ózinde eki patrýldik polıtsııa batalony 500-den astam qylmysty ashyp, 100-den asam júrgizýshige kómek kórsetti», - dedi Beket Aımaǵambetov jeke quram aldynda sóılegen sózinde.

Búginde Qostanaı oblysynyń patrýldik polıtsııasy qajetti quralarmen jabdyqtalǵan. Atap aıtqanda, ár ekıpajda elektrondyq rýletkalar, pýlverızatorlar, planshetter bar. Sonymen qatar tártip saqshylary jol-kólik oqıǵasyn tirkeý ýaqytyna ózgeris ákeldi. Patrýldeýshi qyzmetker jol-kólik apaty ornyna kelgende aldymen oqıǵa jelisin syzady. Qujattar jergilikti polıtsııa qyzmetinde resimdeledi. Osylaısha, kólikter jolda turmaıdy, al jol-kólik oqıǵalaryn tirkeý ýaqyty 30 mınýtqa deıin qysqardy.
«Búgin sizder qıyn jaǵdaıda jumys isteısizder jáne óz densaýlyqtaryńyzdy qorǵaý kerek. Barlyq qyzmetkerler qajetti qorǵanys quraldarymen qamtamasyz etilgen. Qazirdiń ózinde Qostanaı oblysy PD emhanasy men gospıtalin nyǵaıtý boıynsha sharalar qabyldanýda. Jaqyn arada munda rentgen jáne ÝDZ apparaty paıda bolady. Qajetti dári-dármekter satyp alyndy», - dep atap ótti Beket Aımaǵambetov.
Polıtsııa bastyǵy polıtsııa qyzmetkerlerin materıaldyq yntalandyrý boıynsha qabyldanatyn sharalar týraly da aıtty.

«Bıyl sógis almaǵan árbir qyzmetker koronavırýsqa qarsy kúreste qyzmet istegeni úshin syıaqy alatyn bolady. Bul óz qyzmettik mindetterin tıimdi oryndaýǵa yntalandyrady», - deıdi polıtsııa generaly.
Máselen, patrýldik polıtsııa rotasynyń komandıri Marat Nurymbetovke osy jyly qylmysty «izin sýytpaı» ashqany úshin syıaqy berildi. Ol óziniń seriktesimen birge birqatar avtokólik urlyqtaryn jasaǵan kúdiktini ustady.
Qazirgi ýaqytta oblysta polıtsııaǵa 90-nan astam volonter uıymy kómek kórsetedi, olardyń quramynda 3 myńǵa jýyq adam bar.