General Atlantic Ekibastuzdaǵy «Derekterdi óńdeý ortalyqtary alqaby» jobasyna qyzyǵýshylyq tanytty
ASTANA. KAZINFORM – Memleket basshysy General Atlantic tóraǵasy jáne bas dırektory Ýılıam Fordty qabyldady, dep habarlaıdy Aqorda.
Áńgimelesý barysynda ınvestıtsııalyq yntymaqtastyq perspektıvasy, sondaı-aq elimizde tehnologııa sektory men jasandy ıntellekt ekojúıesin damytý máseleleri talqylandy.
Qasym-Jomart Toqaev jasandy ıntellekt pen tsıfrlyq transformatsııa el damýyndaǵy basty mindetterdiń biri ekenin atap ótti. Osyǵan oraı jańa jobalardy júzege asyrý úshin sheteldiń jetekshi ınvestorlary men tehnologııalyq kompanııalaryn tartý mańyzdy.
Prezıdent Qazaqstanda jańa tehnologııalyq ekojúıe qalyptasyp jatqanyn aıtty. Onyń quramyna Astana Hub, Alem.ai halyqaralyq jasandy ıntellekt ortalyǵy, Qazaq AI Research University kiredi.
Memleket basshysynyń aıtýynsha, atalǵan ekojúıeni damytý Higgsfield AI sekildi álemdik naryqta básekege qabiletti tehnologııalyq kompanııalardyń paıda bolýyna septigin tıgizedi.
Óz kezeginde Ýılıam Ford Qasym-Jomart Toqaevqa General Atlantic kompanııasynyń qarjy tehnologııasy, elektrondyq kommertsııa, baǵdarlamalyq jasaqtama jáne jasandy ıntellekt salalaryndaǵy jedel damyp kele jatqan kompanııalarǵa, sondaı-aq energetıkalyq jáne tsıfrlyq ınfraqurylymǵa ınvestıtsııa quıý múmkindikteri týraly aıtty.
Sonymen qatar Qazaqstan Prezıdenti men General Atlantic tóraǵasy Ekibastuzda júzege asyrylatyn «Derekterdi óńdeý ortalyqtarynyń alqaby» jobasyna nazar aýdardy. Osy ortalyq aıasynda jasandy ıntellektige, «bulttyq» esepteýlerge jáne tsıfrlyq servısterge arnalǵan iri ınfraqurylym alańy jasalady. Qazirgi tańda General Atlantic kompanııasy atalǵan jobaǵa qatysýǵa qyzyǵýshylyq tanytyp otyr.
Aıta keteıik, Qazaqstanda NVIDIA tehnologııasynyń bazasynda eki sýperkompıýter klasteri iske qosyldy.
