Gendik-ınjenerlik qyzmetti memlekettik retteý zańmen negizdeledi
ASTANA. 16 qyrkúıek. QazAqparat - «Gendik-ınjenerlik qyzmetti memlekettik retteý týraly» Qazaqstan zań jobasynyń negizgi maqsaty gendik-ınjenerlik qyzmetti memlekettik retteý jáne qazirgi zamanǵy bıotehnologııa ádisterin qoldana otyryp alynǵan genetıkalyq túrlendirilgen obektilerdi (GTO) alýmen, synaýmen, óndirýmen, paıdalanýmen jáne ótkizýmen baılanysty qoǵamdyq qatynastardy reglamentteý bolyp tabylady.
Búgin Májiliste «Gendik-ınjenerlik qyzmetti memlekettik retteý týraly» zań jobasynyń tanystyrylymy ótedi
Úkimettiń bergen túsindirmesine súıensek, zań jobasynyń retteý máni gendik-ınjenerlik qyzmetti júzege asyrý kezinde týyndaıtyn, olardy bıologııalyq qaýipsizdik jaǵdaıynda júzege asyrý qamtamasyz etiletin, GTO-nyń adam densaýlyǵyna, bıologııalyq ártúrlilikke, ekologııalyq tepe-teńdikke jáne qorshaǵan ortanyń sapasyna qolaısyz áser etý qateriniń aldyn alýǵa, boldyrmaýǵa jáne azaıtýǵa múmkindik beretin qoǵamdyq qatynastar bolyp tabylady.
Zań jobasy sheńberinde, jalpy gendik-ınjenerlik qyzmetti úılestirý úshin Qazaqstan Respýblıkasy Bilim jáne ǵylym mınıstrligi janynan quramyna múddeli memlekettik organdar men ǵylymı ortanyń ókilderi kiretin Úılestirý ortalyǵy qurylatyn bolady.
Zań jobasyn qabyldaý gendik-ınjenerlik qyzmetti júzege asyrý kezinde týyndaıtyn áleýetti qaýipterdiń paıda bolýyn qadaǵalaý tetigin qalyptastyrýǵa, gendik-ınjenerlik qyzmetti damytý úshin jaǵdaı jasaýǵa, eldiń bıologııalyq ártúrliligin saqtaýǵa jáne gendik-ınjenerlik qyzmettiń jekelegen túrlerin júrgizýdiń tártibin belgileýge múmkindik beredi.
Zań jobasy ǵylymı-quqyqtyq saraptamadan ótken.
Zań jobasyn iske asyrý respýblıkalyq bıýdjetten qarjy shyǵyndaryn talap etpeıdi.
