Genderlik teńsizdik, ásirese, saıasat pen eńbek salasynda aıqyn kórinis taýyp otyr - A. Samaqova
ASTANA. Jeltoqsannyń 11-i. QazAqparat /Aıdar Ospanalıev/ - «Genderlik teńsizdik, ásirese, saıasat pen eńbek salasynda aıqyn kórinis taýyp otyr», dedi búgin Májilis depýtaty Aıtkúl Samaqova.
Bul týraly ol Astanada «Áıelderdiń qoǵamdaǵy saıası múmkindikteri - genderlik demokratııanyń ustanymdary, problemalar men perspektıva» atty taqyrypta ótken konferentsııa barysynda málim etti, dep habarlaıdy QazAqparat.
Depýtattyń aıtýynsha, ótken jyly memlekettik áleýmettik tapsyrys negizinde genderlik teńsizdikke baılanysty keshendi áleýmettik zertteý júrgizilgen. Genderlik teńsizdiktiń saıasat pen eńbek salasynda kórinis taýyp otyrǵandyǵyn osy zertteýdiń nátıjeleri kórsetken. «Alaıda, elimizde áıelderdiń de, erlerdiń de ambıtsııalarynyń joǵary ekendigin atap ótken jón. Mysaly, erlerdiń ekiden úshi jetekshi bolǵysy, áıelderdiń teń jartysy basshylyq qyzmet atqarǵandy qalaıdy jáne osy erlerdiń de, áıelderdiń de kópshiligi laýazymdaryn ósirýge kúsh salyp, biliktilikterin arttyryp keledi. Zertteý jumystaryna qatysqandardyń jartysyna jýyǵy kásipkerlikpen aınalysqandy jón sanaıdy. Bul árıne, qýanarlyq jáıt. Óıtkeni tek ambıtsııasy basym, ekonomıkalyq jaǵynan táýelsiz áıelder ǵana saıasatqa keledi. Al álemdik tájirıbe boıynsha áıel azamattar qandaı jaǵdaıda bolmasyn ar-ujdandyq saıasat júrgizgendi jón kóredi», dedi depýtat.
