Genderlik teńdikke jasalǵan kezekti qadam - Dáýren Abaev Espaevanyń saılaýǵa qatysýy jóninde

NUR-SULTAN. QazAqparat - QR Aqparat jáne qoǵamdyq damý mınıstri Dáýren Abaev QR Prezıdenti saılaýyna qatysýshylar jóninde pikir bildirdi, dep habarlaıdy QazAqparat tilshisi.

Onyń aıtýynsha, Nur Otan partııasy atynan Qasym-Jomart Toqaevtyń usynylýy tańqalarlyq jańalyq emes.

«Bıyl 19 naýryzdan bastap, Elbasy Qasym-Jomart Kemelulyna birneshe ret qoldaý bildirdi. Sondyqtan da Nur Otan partııasy atynan Qasym-Jomart Kemelulynyń usynylýy tańqalarlyq jańalyq emes. Bir ǵana partııany bóle-jara aıtýǵa bolmaıdy. Bul aptada Sádibek Túgel, Danııa Espaeva, Amangeldi Taspıhov syndy jańa úmitkerlerdi bildik. Jaqyn kúnderi odan da basqa kandıdattardyń esimi atalady», - dedi D. Abaev Habar» arnasyndaǵy «Ashyq dıalog» baǵdarlamasynda

Sonymen birge, mınıstr tuńǵysh ret qazaqstandyq áıeldiń Prezıdent saılaýyna qatysýy jóninde óz oıyn bildirdi.

«Menińshe, Danııa Espaevanyń partııalastarynyń bul sheshimin tek qana qoldaýymyz kerek. Bul óte aıryqsha oqıǵa jáne qoǵamymyzdyń genderlik teńdikke qaraı jasaǵan kezekti qadamy. Ony elimizdiń barlyq óńirinde ókildikteri bar, 250 myń adamnan quralǵan partııa usynyp otyr. Maqtanǵandaı estilýi múmkin, biraq bul - Qazaqstan áıelderiniń úlken jeńisi», - dedi Dáýren Abaev.