Genderlik saıasatqa surqııa saıasat degen anyqtama bergen durys emes - G.Ábdihalyqova
ASTANA. 8 Qarasha. QazAqparat /Gúlmıra Álıakparova/ - Genderlik saıasatqa surqııa saıasat degen anyqtama bergen durys emes.
Búgin Astanada memlekettik qyzmetkerlerdiń biliktiligin arttyrýǵa baǵyttalǵan semınarda QR Eńbek jáne halyqty áleýmettik qorǵaý mınıstri, Áıelder jáne otbasylyq-demografııalyq saıasat jónindegi Ulttyq komıssııanyń tóraıymy Gúlshara Ábdihalyqova osyndaı pikir bildirdi.
G.Ábdihalyqova qazir birqatar buqaralyq aqparat quraldarynda genderlik saıasat máselesi surqııa saıasat dep jazylyp júrgenin aıtyp, bul teńeýmen múldem kelispeıtindigin qadap aıtty. «Surqııa» degen sóz - soǵys týraly, ne bir jaman jaǵdaılardy aıtqan kezde qoldanylady. Genderlik saıasatqa mundaı anyqtama bergen durys emes», - deıdi ol.
Onyń paıymdaýynsha, Qazaqstanǵa álemdegi bedeldi uıymdardyń múshesi retinde, EQYU-ǵa tóraǵalyq etip otyrǵan kezde jáne jalpy ashyq el retinde bul saıasat óte qajet.
Ulttyq komıssııanyń tóraıymy atap kórsetkendeı, Qazaqstanda Táýelsizdik jyldary ishinde memlekettik saıasattyń bul baǵytynda aıtarlyqtaı ilgerileýshilikter boldy. Máselen, 2010 jylǵy 12 qazanda «Davostaǵy dúnıejúzilik ekonomıkalyq forýmy» úkimettik emes uıymynyń «Jahandyq genderlik aıyrma - 2010 jyl» atpen jarııalaǵan baıandamasynda Qazaqstan genderlik saıasattyń damýy boıynsha 134 eldiń arasynda 41-inshi oryndy ıelengendigi jazylǵan. Reseı, Polsha, Slovenııa, Frantsııa, Italııa jáne ózge de damyǵan elder bul tizimge bizden keıin ornalasqan.
Onyń sózine qaraǵanda, Qazaqstandaǵy bul saıasat álem elderiniń aldyńǵy 30-dyǵyna kirgen kezderi de bolǵan. Ol kezeń elde áıelder qozǵalysy belsendi bolǵan, úkimettik emes uıymdar quryla bastaǵan 2000 jyldardyń basy bolatyn.
Aıta keteıik, Qazaqstan Respýblıkasy Prezıdentiniń janyndaǵy Otbasy jáne áıelder isteri jónindegi Ulttyq komıssııa QR Prezıdentiniń 1998 jyldyń 22 jeltoqsanyndaǵy Jarlyǵymen qurylǵan bolatyn. Osy ýaqytqa deıin komıssııa ataýyn birneshe ret ózgertti. Elbasy Ulttyq komıssııa qyzmetiniń tórt negizgi baǵytyn belgiledi. Bular - áıelderdiń jáne olardyń otbasylarynyń densaýlyǵyn jaqsartý, áıelderdiń elimizdiń qoǵamdyq-saıası ómirine belsendi qatysýy jáne olardy sheshimder qabyldaı alý deńgeıine deıin alǵa jyljytý, áıelderdi ekonomıkalyq turǵyda alǵa jyljytý jáne áıelderge qatysty zorlyq kórsetýdiń barlyq túrin joıý.
