Genderlik saıasatqa qatysty zań jobasyn keıinge ysyra berýge bolmaıdy - G. Ábdihalyqova

ASTANA. Qarashanyń 5-i. QazAqparat /Qanat Mámetqazyuly/  - Búgin QR Parlamenti Májilisinde «Áıelder men erkekterdiń teń quqyqtary men birdeı múmkindikteri týraly» QR zań jobasy boıynsha jumys tobynyń otyrysy barysynda QR Prezıdenti janyndaǵy Áıelder isi jáne otbasy-demografııa saıasaty jónindegi ulttyq komıssııasynyń tóraıymy Gúlshara Ábdihalyqova atalǵan qujatty qabyldaýdyń ýaqyty jetkendigin atap ótti,

 dep habarlaıdy QazAqparat.

«Qazaqstan Respýblıkasy BUU-nyń «Áıelderge qatysty kemsitýshiliktiń barlyq túrlerin joıý týraly» Konventsııasyna 1998 jyly qosylǵan bolatyn. Osy jyldan beri biz eki márte BUU komıteti aldynda osy konventsııanyń oryndalýy týraly esep berip óttik. Jalpy, bundaı esep durys baǵalanyp, Qazaqstan áıelderge qatysty teń múmkindikter máselesinde birshama jetistikterge jetkenin dáleldep otyr. Al Qazaqstan tarapynan osyndaı kezekti esep 2011 jyly beriletin bolady. Sonymen birge, BUU-nyń osy halyqaralyq konventsııanyń júzege asýyn baqylaıtyn komıteti Qazaqstanǵa áıelder men erkekterdiń teń quqyqtary men birdeı múmkindikteri týraly zań qabyldaýdy jedeldetý týraly eki márte eskertý jasady», dedi G. Ábdihalyqova.

 Onyń aıtýynsha, bul baǵyttaǵy zańdy qabyldaý týraly  Memleket basshysynyń bekitken 2006-2016 jyldarǵa arnalǵan genderlik teńdik strategııasynda da kórsetilgen bolatyn. Sonymen birge, qazaqstandyq áıelderdiń 4-shi forýmynda, Parlamenttiń aǵymdaǵy sessııasyn ashý barysynda da  Elbasy atalǵan qujatqa qatysty tapsyrma júktegen. QR Prezıdenti janyndaǵy Áıelder isi jáne otbasy-demografııa saıasaty jónindegi ulttyq komıssııa tarapynan osy máselelerge qatysty ulttyq tetik te ázirlengen. «Sondyqtan da, bul zań jobasyn ádettegideı keıinge ysyra berýge bolmaıdy. Halyqaralyq uıymdar, qoǵamdyq birlestikter men úkimettik emes uıym ókilderi tarapynan tıisti usynymdar kelip tústi. Osylardy eskere otyryp, zań jobasyn ýaqtyly palatanyń qaraýyna shyǵarýǵa kúsh salý kerek», dedi G. Ábdihalyqova.