Genderdik teńdik jemqorlyqty azaıtady - sarapshy
ASTANA. QazAqparat - Memlekettik baǵdarlamalar men saıasat genderdik prızmany esepke ala otyryp, qadam jasaǵanda áleýmettik qarbalastyq azaıady. Bul týraly Nazarbaev Ýnıversıteti Memlekettik saıasattyń joǵarǵy mektebiniń assıstent-professory Saltanat Janenova aıtty, dep habarlaıdy QazAqparat tilshisi.
«EYDU quramyna ený úshin Qazaqstanǵa genderlik teńdik máselesin damytý kerek. Qazaqstan táýelsizdik alǵannan beri bul baǵytta aıtarlyqtaı progres bar. Depýtattyq korpýsta aıtarlyqtaı ilgerileýshilik seziledi. Ondaǵy depýtattardyń 20 paıyzy áıelder. Alaıda atqarýshy júıelerdegi basqarý laýazymdarynda áıelderdiń úlesi áli de az kúıde qalyp otyr. Saıası laýazymdardaǵylardyń ishinde áıelderdiń úlesi bar-joǵy - 10 paıyz. Oblys ákimderiniń birde-biriniń ishinde áıel ákim joq. Aýdan ákimderiniń ishinde de áıelder tym az. Alaıda statıstıka kórsetip otyrǵandaı, Qazaqstan áıelderi - joǵary bilimdi ári bilikti mamandar», - deıdi ol Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken brıfıngte.
Sarapshynyń aıtýynsha, laýazymdy qyzmet atqaratyn áıel mınıstrler óziniń bilikti ekenin baıaǵyda-aq dáleldep qoıǵan.
«Genderlik teńdik bizge ne beredi? Bul bizge ǵylym-ekonomıkalyq ósimge jol ashady. Álem elderindegi ǵylymı zertteýler men halyqaralyq tájirıbe kórsetip otyrǵandaı, basqarýshy áıelder otyrǵan jerde JІÓ men ekonomıkalyq ósim anyq baıqalǵan. Sebebi, áıelderdi jumysqa turǵyzý múmkindikteri keńeıip keledi. Memlekettik baǵdarlamalar men saıasat genderdik prızmany esepke ala otyryp, qadam jasaǵanda áleýmettik qarbalastyq azaıady. Al Qazaqstanda halyqtyń basym kópshiligin áıelder quraıtynyn aıta ketý kerek. Sonymen birge, ǵylymı turǵyda dáleldenip otyrǵandaı, áıelder qaýymy jemqorlyq jaǵdaılaryna sırek ushyrap jatady», - deıdi Saltanat Janenova.
