Gena ekeýmizge de qazaqtyń kók Týynyń jyǵylmaǵany qymbat - Q. Islam
ALMATY. QazAqparat - Taıaýda AQSh-ta óziniń 21-shi kezdesýin jeńispen aıaqtaǵan 31 jastaǵy qazaqstandyq kásipqoı boksshy Qanat Islam búgin Almatyǵa oraldy.
Jýrnalısterdiń qoıǵan kóptegen suraqtarynyń biri - Gennadıı Golovkın ekeýiniń arasynda bolýy múmkin jekpe-jek edi. Qanat óz jaýabynda bul máselege birjola núkte qoıdy. ıAǵnı, Qanat Islam men Gennadıı Golovkın bir-birine qarsy sharshy alańǵa shyqpaıdy.
«Gena da qazaq, men de qazaq. Ekeýmizge de bir-birimizben judyryqtasqanymyz emes, qazaqtyń kók Týynyń jelbiregeni, abyroıynyń asqaqtaǵany qymbat. Men Genany jasy úlken aǵa retinde, qazaqtyń Týyn kótergen batyry retinde syılaımyn. Ol Týy jyǵylmaı, taýy shaǵylmaı aldymyzda júrse, men sol Týdyń jyǵylmaýyna jarap jatsam, menen asqan baqytty adam joq», - dedi Qanat Islam.
Al «Bir jekpe-jegińiz úshin qansha aqsha alasyz?», - degen suraqqa Qanat jymıyp, osy kezdesýleri úshin áli syıaqy alyp kórmegenin ashyq aıtty.
«Men shynyn aıtqanda osy ótkizgen kezdesýlerimniń eshbirinde syıaqy alyp kórmedim. Óıtkeni, men ol jaqta syıaqy alý úshin júrgen joqpyn. Menimen kim shyqqysy keledi, sonymen shyǵyp júrmin. «Al, maǵan aqsha bermeseńder men shyqpaımyn», - dep júrsem, kúni búginge deıin 21 emes, múmkin 5-aq kezdesý ótkizýim múmkin edi. Meniń osy jekpe-jekterimniń barlyǵyna Baýyrjan aǵam (red. Ospanov) mıllıondaǵan qarjysyn bólip jatyr. Ne úshin? Ekeýmizde de bir ǵana ıdeıa, bir ǵana maqsat bar. Bul jeke bastyń qamy emes. Bul jerde bizge qazaqtyń kók Týy men ataq-abyroıy qymbat bolyp tur. Dúnıe - qoldyń kiri, shynyn, aıtqanda. Sol úshin, dál qazir, bizdiń jas memleket úshin, biz sekildi jastardyń el namysyn qorǵaýy qymbat dep oılaımyn», - dedi Q. Islam.
