Gemotologııalyq jáne onkologııalyq aýrýlar balalar ólimi oqıǵalarynyń arasynda ekinshi orynda tur - D. Nazarbaeva
ASTANA. 8 aqpan. QazAqparat /Qanat Mámetqazyuly/ - Statıstıka málimetteri boıynsha Qazaqstanda bir jastan asqan balalar ólimi arasynda oqys oqıǵalar, sýıtsıdter, jaraqat alý men avtoapattardan keıingi ekinshi orynda gematologııalyq jáne onkologııalyq aýrýlar tur.
Búgin QR Parlamenti Májilisiniń jalpy otyrysynda Densaýlyq saqtaý mınıstriniń atyna saýal joldaǵan depýtat Darıǵa Nazarbaeva osy máseleni kóterdi.
Saýal barysynda D. Nazarbaeva Elbasynyń Joldaýynda eń birinshi kezekte onkologııalyq aýrýlardan bolatyn ólim-jitimdi tómendetý máselesi qoıylǵanyn aıta kele, Pedıatrııa jáne balalar hırýrgııasy ǵylymı ortalyǵynda aýyr onkologııalyq syrqat túrlerinen jyl saıyn 600-650 bala emdeletinin jetkizdi.
Depýtattyń aıtýynsha, BFM german protokolynyń aralasýy arqasynda Qazaqstanda leıkemııa boljamyna birshama ózgerister engen. «Alaıda onkogematologııa aýrýlaryn emdeý salasynda qol jetken nátıjeler, halyqaralyq standarttarǵa jaqyndaý kórsetkishteri bizdi esh qanaǵattandyrmaıdy. Óıtkeni balalar arasynda hımııaterapııalyq emdeýge boı bermeıtin belgili bir toptaǵy naýqastar da barshylyq. Sondyqtan da kemik maıyn aýystyryp salý problemasy osy toptaǵylar úshin ómir men ólim arasynda turǵan másele bolyp qala bermek» , - dedi D. Nazarbaeva.
Bul rette elimizde osy sanattaǵy aýrýǵa shaldyqqan balalardyń qaıtys bolyp jatqanyna toqtalǵan depýtat, Qazaqstanda kemik maıynyń transplatatsııasy eń ózekti másele bolyp otyrǵanyn atap ótti. Leıkemııaǵa shaldyqqandardyń basym bóligi az qamtylǵan otbasylardan bolǵandyqtan, memleket tarapynan kóp kómek qajet etiletinin de jetkizdi. «Onkogematologııalyq qyzmetti damytý strategııasyn júzege asyrý jáne respýblıkada balalar ólimin tómendetý úshin osy salaǵa jańa zamanaýı tehnologııalardy engizý qajet. Emdeý jáne dıagnostıkalyq ortalyqtary zamanaýı jabdyqtarmen jaraqtandyrylýy kerek», - degen depýtat, Densaýlyq saqtaý mınıstrligine birqatar saýaldar boıynsha jaýap berýdi surady.
