Gemoglobınniń aǵza úshin mańyzy qandaı?
ASTANA. QazAqparat - Gemoglobın - erıtrotsıtterdiń nemese qannyń qyzyl túıirshikteriniń quramyna kiredi. Gemoglobın aqýyzdar men temirden turady jáne osy aqýyzdar men temir qanǵa qyzyl tús beredi. Gemoglobın aǵzanyń barlyq tinderin ottegimen qamtamasyz etedi. Ol aǵzanyń ındekatory bolyp tabylady. Osyndaı aǵza úshin mańyzdy ról atqaratyn gemoglobın jaıynda tolyq aqparat legin usynamyz.
Gemoglobındi qalaı ólsheıdi?
Gemoglobın deńgeıin qan taldaýy arqyly anyqtaıdy. Qandy tamyrdan nemese saýsaqtyń ushynan alyp, zerthanaǵa jiberedi. Gemoglobınniń taldaýy arqyly kóptegen aýrýlar anyqtalady. Klınıkalyq saraptamada jalpy gemoglobın arqyly qanazdyqty anyqtaıdy. Qant dıabetin anyqtaý úshin, bıohımııalyq saraptamanyń quramyna kiretin glıýkozaly gemoglobındi qoldanady.
Gemoglobın joǵary bolsa...
Sportpen turaqty shuǵyldanyp, fızıkalyq kúsh túsken kezde gemoglobın kóterilip ketedi. Adamnyń turǵylyqty jerine baılanysty lastanǵan aýadan da gemoglobınniń deńgeıi kóterilýi múmkin. Ekologııasy nashar aımaqta kóp júrgennen de kóteriledi. Sonymen qatar temekini kóp shegetin adamdarda da gemoglobın kóterińki bolady.
Gemoglobınniń joǵary bolýy onkologııalyq jáne qan aýrýlarynyń, sonymen qatar júrek, ókpe jetimsizdiginiń, týa bitken júrek kemistigi sııaqty taǵy da basqa aýrýlardyń belgisi bolyp tabylady. Aqýyz deńgeıiniń kóp bolýy erıtrotsıtoz ben qannyń qoıýlanýynan baıqalady. Kóptegen dárýmenderdiń quramynda folıı qyshqyly, qannyń quramyndaǵy temirdi kóteretin V tobyndaǵy dárýmender bolatyndyqtan, gemoglobın kóterilgende dárigerdiń keńesinsiz eshqandaı dárýmender ishýge bolmaıdy. Ony qalpyna keltirý úshin dáriger qannyń uıyǵyshtyǵyn jaqsartyp, qandy suıyltatyn dáriler jazyp berýi múmkin.
Gemoglobın tómendese...
Erıtrotsıtterdi jasap shyǵaratyn zattardyń jetispeýinen gemoglobın tómendeıdi. Gemoglobınniń tómendeýi qanazdyqtyń ulǵaıýyna sebep bolady. Gemoglobıni tómendegen adam tez sharshap, bozaryp, terisi qurǵaıdy. Únemi basy aýyryp, shashy túse bastaıdy, uıqysyzdyq paıda bolady. Adam aǵzasyna V dárýmeni men folı qyshqylynyń jetispeýi gemoglobınniń temendeýine áser etedi. Gemoglobınniń tómen bolýy kóptegen aýrýlardyń belgisin bildiredi. Temir men basqada qorekti zattardyń qajettiliginiń ulǵaıýyna baılanysty júkti áıelderde gemoglobın tómendep ketedi.
Gemoglobındi kóterý úshin:
Gemoglobındi kóterýge arnalǵan dárilerdi tek dárigerdiń ruqsatymen ǵana qoldaný kerek. Olarǵa quramynda temiri bar dáriler jatady. Quramynda gemoglobındi kóteretin zattary bar taǵamdar balalardyń gemoglobınin kóteretin birden bir dárilik zat bolyp tabylady. Temir men dárýmenderdiń jetispeýi balanyń aqyl oıynyń damýyna keri áser etedi. Gemoglobıni tómen balalardyń túri solyńqy bolady, sabaq úlgerimi nasharlaıdy, fızıkalyq belsendigi tómendeıdi. Gemoglobındi kóteretin taǵamdarǵa mynalarǵa jatady: sıyrdyń baýyry, qaraqumyq botqasy, jasyl tústi jemister, anar, alma, shabdaly, nan. Olardan ózge quramynda kaltsıi bar taǵamdardy da qoldanǵan durys. Sút ónimderin az tutyný kerek nemese toqtata turǵan durys.
Temirdiń sińýin báseńdetetin bolǵandyqtan, gemoglobıni tómen adamdarǵa kofe, shaı ishýge bolmaıdy. Al askorbın qyshqyly (S dárýmeni) qandaǵy aqýyzdyń kóterilýine jaqsy áser etedi. Sondyqtan apelsın nemese qyzanaq shyrynyn ishińiz jáne balǵyn lımon shyryny men oramjapyraq, tátti burysh, pııaz ben kók-sókterdi kúndelikti as mázirine qossańyz durys.
Halyq emi boıynsha...
1. Tazartylǵan 1 staqan grek jańǵaǵy men 1 staqan shıki qaraqumyqty kofetartqyshpen untaqtap, kúnde 1-2 as qasyqtan qoldaný kerek.
2. 1 staqan qaraqumyqty tazalap jýyp, 1 staqan aıran quıyp, 12 saǵat tundyryp, qajetinshe qoldanýǵa bolady.
3. Meıizdi, jańǵaqty, keptirilgen órikti usaqtap týrap, balmen aralastyryp, kúnde bırneshe as qasyqtan jep turý kerek. Bul tek gemoglobındi kóterip qoımaıdy, sonymen qatar aǵzańyzdy basqa mıneraldy zattarmen toltyrýǵa septigin tıgizedi.
Gemoglobındi túsirý úshin:
Gemoglobındi túsirý úshin túrli botqalar men jemis-jıdekterdi shıkideı nemese buqtyryp jeý kerek. Tamaqpen birge balǵyn salattardy da qoldanýǵa bolady. Qyzyl tústi jemis-jıdekter gemoglobındi kóteretin bolǵandyqtan, olardy gemoglobıni joǵary adamǵa jeýge bolmaıdy. Gemoglobındi túsirýdiń taǵy bir halyq emi - súlikti qoldaný bolyp tabylady. Súlik erte kezden túrli aýrýlarǵa em. Sonymen qatar súlik qan quramyn rettep, gemoglobındi qalpyna keltiredi. Sonymen qatar shynyǵyp, salaýatty ómir saltyn ustaný kerek, dep jazady massaget.kz.
