Gemofılııamen aýyratyndardyń qazaqstandyq qaýymdastyǵy dári satyp alý úshin tender merziminiń shegerilýine alańdaýshylyq bildirdi
ALMATY. Jeltoqsannyń 7-si. QazAqparat /Erbol Azanbek/ - Búgin Almatyda Gemofılııamen aýyratyndar qaýymdastyǵynyń ókilderi baspasóz máslıhatyn ótkizip, 2010 jyly dári satyp alý úshin ótkiziletin tenderge alańdaýshylyq bildirdi,
dep habarlaıdy QazAqparat.
«Gemofılııamen aýyratyndardyń qazaqstandyq qaýymdastyǵy» qoǵamdyq birlestiginiń prezıdenti Tamara Rybalovanyń aıtýynsha, búgin ótkizilýi tıis gemofılııaǵa qarsy dári-dármekter tenderi 2010 jyldyń qańtar aıyna qaldyrylǵan. «Quzyrly organdar bunyń negizgi sebepteriniń biri qan preparattary óndirisi zaýytynyń salynýy deıdi. Tenderdiń kesh ótkizilýi aýrýlardy emdeýge úlken kedergi keltiredi. Sondyqtan tender jaqyn arada ótkizilýi tıis», deıdi T.Rybalova.
Onyń aıtýynsha, 2007 jyly Qazaqstanda gemofılııany emdeý úshin bıýdjettik baǵdarlama ázirlengen. 2008 jyly qoldanysqa engizilip, 2009-2011 jyldarǵa arnalǵan baǵdarlama bekitilgen. Osyǵan sáıkes 2009 jyly eresekterge 3 mıllıard 143 mıllıon 827 myń teńge, 2010 jylǵa 3 mıllıard 419 mıllıon 293 myń teńge, 2011 jylǵa 3 mıllıard 707 mıllıon 561 myń teńge bóliný kózdelgen. «Osyǵan sáıkes bıyl gemofılııamen aýyratyndar dárimen tuńǵysh ret tegin qamtamasyz etildi. Aýrýlar jaqsara bastady. Bıyl bizdiń delegatsııa Máskeýde ótken halyqaralyq konferentsııaǵa qatysty. 60-qa jýyq qatysýshy memleketter arasynda qazaqstandyq aýrýlardyń dárimen qamtylýy eń úzdik bolyp tanyldy», deıdi T.Rybalova.
Onyń aıtýynsha, belgisiz sebeptermen tender merziminiń shegerilýi QR Úkimetiniń «Memlekettiń azamattardy tegin medıtsınalyq kómekpen kepildendirilgen kólemde qamtý» týraly qaýlysyna qaıshy.
