Gemofılııamen aýyratyndar dári-dármekterdiń kesheýildeýine alańdaýly - Almatydaǵy baspasóz máslıhaty
ALMATY. Sáýirdiń 8-i. QazAqparat /Názıra Eleýhan/ - Qazaqstandaǵy Gemofılııamen aýyratyndar qaýymdastyǵynyń ókilderi dári-dármekpen qamtamasyz etý máselesine alańdaýly.
Bul týraly búgin Almatyda ótken arnaıy baspasóz máslıhatynda aıtyldy, dep habarlaıdy QazAqparat.
Qazaqstandaǵy Gemofılııamen aýyratyndar qaýymdastyǵynyń prezıdenti Tamara Rybalovanyń aıtýynsha, bıylǵy jyly naýryzdyń 26-sy kúni satyp alý boıynsha memlekettik tender bolyp ótken. "Tenderdiń tártibi boıynsha, ol ótkennen 10 kún assa da, áli kúnge deıin nátıjesi jarııalanǵan joq. Al, odan keıin rásimdeý, dárilerdi jetkizý jáne taǵy da basqa isterdi atqarýǵa birtalaı, ortasha alǵanda 90 kún kerek. Bul gemofılııamen aýyratyndar úshin úlken kidiris. Óıtkeni, qazirdiń ózinde Almatyda, oblystaǵy bólimshelerde de dáriler taýsyldy. Qalanyń kúndizgi bólimderinde qajetti 250 orama ǵana qaldy. Biz sondyqtan, olardyń densaýlyqtary men ómirine alańdaýlymyz", dedi Tamara Rybalova.
Ol sonymen qatar, "QR Densaýlyq saqtaý mınıstrligi dári-dármekpen qamtamasyz etýde gemofılııanyń ıngıbıtorlyq aýyr túrimen, sondaı-aq fon- Vıllebrandamen aýyratyndardy esepke almaıdy", dep atap ótti.
