Gemini sheteldegi jol belgilerin oqyp, birden aýdara alady
ASTANA. KAZINFORM — Google kompanııasy Gemini jasandy ıntellekt kómekshisiniń jańa tájirıbelik múmkindigin tanystyrdy. Endi júıe avtokóliktiń kamerasy arqyly joldaǵy qorshaǵan ortany taldaı alady. Jańa tehnologııa Volvo EX60 elektrli krossoverinde kórsetildi. Bul týraly ArenaEV-ge silteme jasap, 24kg jazdy.
Jańa fýnktsııanyń kómegimen Gemini aldyńǵy baǵytqa ornatylǵan kameradan alynǵan keskindi taldap, jol boıyndaǵy ǵımarattar, kórikti oryndar men basqa da nysandar týraly suraqtarǵa jaýap bere alady. Osylaısha, alǵash ret tildik jasandy ıntellekt modeli avtokóliktiń qorshaǵan ortany kórý júıesimen biriktirildi.
Tehnologııa Google kompanııasynyń Maýntın-Vıý qalasyndaǵy kampýsynda tanystyryldy. Synaq kezinde Gemini birneshe nysandy, sonyń ishinde The Orb art-obektisin, Gradient Canopy ǵımaratynyń kún panelderi ornatylǵan shatyryn jáne Shoreline Amphitheatre kontsert alańyn tanyp, olardyń tarıhy men erekshelikteri týraly málimet berdi.
Júıe turaqty túrde beınejazba júrgizbeıdi. Kamera júrgizýshi suraq qoıǵan kezde ǵana iske qosylady, al jaýap berilgen soń keskinge qoljetimdilik avtomatty túrde toqtatylady. Bul paıdalanýshylardyń jeke derekteriniń qupııalylyǵyn qorǵaýǵa baǵyttalǵan.
Ázirge tehnologııa ázirleýdiń bastapqy kezeńinde tur. Kórsetilim barysynda derekterdiń serverge jiberilýine baılanysty jaýap berý kezinde azdaǵan kidiris baıqaldy. Sonymen qatar mýltımedııalyq júıeniń ekranynda kameradaǵy kórinis kórsetilmeıdi, júrgizýshi tek daýystyq jaýap alady.
Google bul múmkindiktiń eń paıdaly qoldanylý baǵyttarynyń biri retinde shetelde kólik júrgizýdi ataıdy. Máselen, júrgizýshi joldan kóz almaı-aq Gemini-den bóten tildegi jol belgisin oqyp, ony aýdaryp berýdi suraı alady. Bul smartfonǵa alańdamaı, qaýipsiz qozǵalysty saqtaýǵa múmkindik beredi.
