Gemini endi qazaq tilinde qoljetimdi

ASTANA. KAZINFORM – QR Táýelsizdik kúnine oraı Google jasandy ıntellektiniń Gemini modelin qazaq tilinde iske qosqanyn jarııalady. Bul - eń ozyq sanalatyn JI-modeliniń tildik qoldaýyn keńeıtýge baǵyttalǵan jahandyq bastamanyń bir bóligi. 

Jasandy ıntellekt jáne tsıfrlyq damý mınıstrligi málimetinshe, qazaq tili Gemini 3 býynyn iske qosý aıasynda qosylǵan 23 jańa tildiń qataryna endi. Bul Qazaqstandaǵy paıdalanýshylarǵa Gemini múmkindikterin álemdegi eń iri tildermen teń dárejede, óz ana tilinde qoldanýǵa múmkindik beredi.

Gemini-diń qazaq tilindegi ınterfeısi qazirdiń ózinde veb-nusqada qoljetimdi. Ol úshin paıdalanýshylar Google akkaýntynyń baptaýlarynda qazaq tilin tańdaýy qajet. Aldaǵy ýaqytta Android jáne iOS júıelerine arnalǵan nusqalardy qoldaý, sondaı-aq Gemini Live servısin iske qosý josparlanyp otyr.

Gemini-diń qazaq tilindegi nusqasynyń iske qosylýy Google kompanııasynyń Qazaqstanda jasandy ıntellektini damytýǵa baǵyttalǵan keń aýqymdy jumysynyń bir bóligi. Bul jumys kadrlardy daıarlaýǵa ınvestıtsııa salýdy, tsıfrlyq daǵdylardy damytýdy jáne ázirleýshilerdi qoldaýdy qamtıdy. Kompanııanyń baǵalaýynsha, jasandy ıntellektini memlekettik sektorǵa engizý ekonomıkalyq jaǵynan da tıimdi. Sebebi ol memlekettik basqarý ónimdiliginiń artýy jáne bıýdjet júıesinde turaqtylyqtyń kúsheıýine septigin tıgizedi ári eldiń ekonomıkalyq ósimine qosymsha úles qosady.

QR Jasandy ıntellekt jáne tsıfrlyq damý mınıstrliginde jahandyq JI sheshimderiniń qazaq tilinde qoljetimdi bolýy tsıfrlyq memleketti damytý, azamattar úshin tehnologııalardyń qoljetimdiligin arttyrý jáne básekege qabiletti AI-ekojúıe qalyptastyrý jolyndaǵy mańyzdy qadam ekenin atap ótti.
Mınıstrlik jasandy ıntellektini damytý, tsıfrlyq ónimderdi lokalızatsııalaý jáne jańa býyn mamandaryn daıarlaý baǵytynda halyqaralyq tehnologııalyq seriktestermen yntymaqtastyqty odan ári jalǵastyrady.

Aıta keteıik, Time jasandy ıntellekt jasaýshylardy «Jyl adamy» atady.