Gelandewagen júrgizýshisi Іlııas Kar: Men mas bolǵan joqpyn
ALMATY. QazAqparat - Almatyda 3 adamnyń ólimine sebepker bolǵan Gelandewagen júrgizýshisi óz kinásin ishinara moıyndady, dep habarlaıdy QazAqparat tilshisi sot zalynan.
«Іlııas Kar QR jol erejesin buzyp, sonyń saldarynan abaısyzda 3 adamnyń ólimine sebepker bolǵany úshin QR QK 345-babynyń 4-bólimimen aıyptalyp otyr. Sondaı-aq, aıyptalýshy Karǵa QR JQE 2 jáne 8-tarmaqtaryn buza otyryp, jol apatynan keıin japa shekkenderdi medıtsınalyq organdarǵa aparmaı, oqıǵa ornynda qaldyryp ketkeni úshin QR QK 347-babymen aıyp taǵylyp otyr», - dedi prokýror.
Al aıyptalýshynyń ózi kinásin ishinara ǵana moıyndady.
«Men óz aıybymdy moıyndap otyrmyn. Biraq ishinara. Men mas boldy degen aıyppen kelispeımin. Sonymen qatar, oqıǵa ornynan ketip qaldy degen 374-bappen de kelispeımin. Men sol jerde boldym. Eshqaıda ketken joqpyn», - dedi Іlııas Kar.
Sot otyrysyna marqum aktrısa Sholpan Elgezekovanyń anasy men týystary, áriptesteri qatysty.
Aıta ketý kerek, qaıǵyly oqıǵa 29 jeltoqsanda bolǵan edi. Abaı men Seıfýllın kósheleriniń qıylysynda Mersedes Gelandewagen jáne Mitsubishi Galant kólikteri soqtyǵysqan bolatyn. Mersedes Gelandewagen kóligi baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy.
Olardyń arasynda belgili aktrısa Sholpan Elgezek bar. Keıin belgili bolǵandaı, 34 jastaǵy Gelandewagen júrgizýshisi kóligin mas kúıindejúrgizgen.
«Mercedes Gelandewagen» markaly avtomobıl júrgizýshisi, 1985 jyly týǵan Kar Іlııas Abaı jáne Seıfýllın dańǵyldarynyń qıylysynda jol apatyn jasaǵandyqtan, QR Qylmystyq-protsesýaldyq kodeksiniń 128-babyna sáıkes ustaldy. Sotqa deıingi tergep-tekserý Qylmystyq kodekstiń 345-babyna jáne 347-babynyń 3-bóligine sáıkes júrgizildi.
Eske sala keteıik, atalǵan jol apatynan aman qalǵan jalǵyz jolaýshy - aktrısa Aızada Satybaldıeva qabyrǵalary synyp, aýyr halde aýrýhanaǵa túsken bolatyn. Eki aptadan soń aktrısanyń beti beri qarap, úıine shyǵaryldy.
