Gektaryna 19,1 tsentnerden astyq bastyrylýda - mınıstr Omarov
NUR-SULTAN. QazAqparat - Qazaqstanda gektaryna 19,1 tsentnerden astyq bastyrylyp jatyr. Bul týraly Úkimet otyrysynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.
«Búgingi kúni Aqtóbe, Almaty, Shyǵys Qazaqstan, Jambyl, Batys Qazaqstan, Qyzylorda jáne Túrkistan oblystarynda dándi daqyldardy jappaı jınaý júrgizilip jatyr. Osy jyldyń 10 tamyzyndaǵy jaǵdaı boıynsha 929,4 myń gektar nemese egin jınalýy tıis alqaptyń 37,3 paıyzy bastyryldy. Ortasha túsim gektaryna 19,1 tsentnerdi quraıdy. Bul ótken jylǵy kórsetkishpen birdeı», - dedi mınıstr.
Onyń dereginshe, búgingi kúnge deıin 1,8 mln tonna dándi daqyl bastyryldy. Ótken jyldyń dál osyndaı kezeńinde 1,4 mln tonna astyq jınalǵan bolatyn.
«Sonymen qatar respýblıkanyń negizgi egin egýshi óńirleri de jańa egin kólemin jınaýǵa kirisip ketti. Búgingi kúni 93,3 myń gektar jerde egis jınaldy. Soltústik óńirler jappaı egin jınaýdy 20 tamyzǵa qaraı bastaıtyn bolady. Nátıjesinde 7 aıdyń qorytyndysy boıynsha ósimdik sharýashylyǵynda ónim kólemi 2,1 paıyzǵa ulǵaıyp, 242 mlrd teńgeni quraıdy», - dedi Saparhan Omarov.
