Gektarynan 20-25 tsentner: Aqtóbelik dıqan egin orý jumysyn bastady
AQTÓBE. KAZINFORM – Aqtóbede egin orý naýqany bastaldy. Alǵa aýdanyndaǵy dıqan gektarynan 20-25 tsentner ónim alyp jatyr.
Aqtóbe oblysy Alǵa aýdanyndaǵy «Ajar+» sharýa qojalyǵy qazir kúzdik egisti jınaý jumysyn júrgizip jatyr.
— Bizdiń ıeligimizde 2,5 myń gektar jer bar. Negizi jer bólingen kezde otbasymyz osy aýmaqty paıǵa alǵan. Bul aýmaqtyń tolyq kádege asqanyna 3 jyl boldy. Barlyǵy 25 adam jumys isteıdi. Olar mehanızator, baqtashy, satýshy men ózge de jumysshylar. Arasynda Aqtóbe qalasynan keletinderi men aýyl turǵyndary bar. Bári úshin aýylda, sharýashylyq basynda jatyn orny, ashanasy qarastyrylǵan. Bul jerdiń jumysshylary maýsymdyq emes, turaqty qyzmet etedi, — dedi «Ajar+» sharýa qojalyǵynyń basshysy Talǵat Qýrtabaev.
Sharýashylyqta egin oqý jumysy osy aptada bastaldy. Kombaın byltyr 10 kún buryn alqapqa túskenimen, bıyl da dıqandar mol ónim jınaýdy kózdep otyr.
— Bıyl gektarynan 20-25 tsentner ónim jınalady. Naqtysy jumys tolyq aıaqtalǵan soń belgili bolady. Qoıma da daıyndaldy. Syıymdylyǵy — 3 myń tonna, — dedi Talǵat Qýrtabaev.
Aıta keteıik, qazirgi kezde Aqtóbe oblysynda 7 qoıma bar. Olardyń jalpy syıymdylyǵy 381 myń tonna.
— Qazirgi kezde qoımada 75 myń tonna astyq bar. ıAǵnı, júkteme 20% quraıdy. Bıylǵy astyqty qabyldaý úshin de daıyndyq qyzý. Jóndeý jumystaryn júrgizip, saqtandyrý sharalary qabyldanady. Bıyl 450 myń tonna dándi daqyl, 60 myń tonna maıly daqyl jınaý josparlanyp otyr. Ónimdi saqtaýǵa tolyq múmkindik bar. Barlyǵy 381 myń tonnalyq qoıma bolsa, sharýashylyqtarda da 304 myń tonna qoıma jasaqtalǵan. Demek 685 myń tonna ónim saqtalýǵa jaǵdaı jasalǵan, — dedi Aqtóbe oblystyq aýyl sharýashylyǵy jáne jer qatynastary basqarmasynyń bólim basshysy Nurbek Raıymbaev.
Aqtóbe oblysynda bıyl 600 myń gektardan astam jerdiń 432 myń gektaryna dándi daqyl, 62 myń gektaryna maıly daqyl egiledi. Mal azyǵy úshin 94 myń gektar jer bólindi.
