ǴEQ elimizdegi medıtsınalyq qaldyqtardy qaýipsiz basqarýǵa 3 mln. dollardan astam qarjy bóledi
ASTANA. QazAqparat - Qazaqstanda medıtsınalyq qaldyqtardy qaýipsiz basqarý jobasy iske qosyldy. Atalǵan joba QR Qorshaǵan orta jáne sý resýrstary mınıstrligi,
BUU Damý baǵdarlamasy jáne Ǵalamdyq ekologııalyq qordyń Aýyr organıkalyq lastandyrǵyshtar týraly Stokgolm konventsııasy boıynsha mindettemelerdi iske asyrýdyń ulttyq josparyn jańǵyrtýǵa ári medıtsınalyq qaldyqtardy tıimdi basqarýǵa baǵyttalǵan birlesken shara aıasynda júzege asyrylmaq.
Joba jetekshisi Nına Gordyń atap ótýinshe, elimizdiń medıtsınalyq mekemelerinde jyl saıyn 20 myń tonnadan astam qaldyqtar túziledi. Al QR densaýlyq saqtaý mınıstrliginiń talaptaryna sáıkes juqpaly aýrýly qaldyqtardy kádimgi qoqys tastaıyn oryndarǵa qaldyrýǵa tyıym salynǵan. Osyǵan baılanysty qaldyqtardyń negizgi bóligi órteý arqyly joıylǵanymen bul shara arnaıy qondyrǵylarda júzege asyrylmaıdy.
«Juqpaly aýrýly qaldyqtardy órteý joǵary ýytty zattardyń aýaǵa taralýyna jáne ekologııalyq ahýaldyń nasharlaýyna soqtyrady», - dedi ol.
Sonymen qatar órtenetin qaldyqtardyń kólemi jaıynda naqty málimetter de joq. Al olardy órteý saldarynan bolatyn shyǵaryndylarǵa monıtorıg júrgizilmeıdi.
«Sondyqtan da qolǵa alynǵan jobany júzege asyrý aıasyndaǵy is-sharalarǵa 3 mln. 400 myń dollar bólinip otyr. Bul Ǵalamdyq ekologııalyq qordyń qarajaty», - dedi N.Gor.
