Geely men GAC 2026 jylǵa deıin óndiristi jergiliktendirmese, Reseı naryǵynan ketýi múmkin
ASTANA. KAZINFORM – Qytaıdyń Geely jáne GAC avtokólik brendteri 2026 jyldyń alǵashqy jartysynda jergilikti óndiriske kirispese, Reseı naryǵynan ketýi múmkin. Bul týraly «Rolf» kompanııasynyń bas dırektory Svetlana Vınogradova málimdedi, dep habarlaıdy TASS.
Avtodılerdiń boljamynsha, 2026 jyly Reseı naryǵynda eki-úsh jańa qytaılyq avtobrend paıda bolady, sonymen qatar osynsha markanyń ketý yqtımaldyǵy da bar.
«Geely men GAC úshin negizgi másele – óndiristi jergiliktendirý. Olardyń naryqtaǵy úlesi aıtarlyqtaı, reseılik tutynýshylar arasynda suranys joǵary. Eger 2026 jyldyń alǵashqy jartysynda lokalızatsııa jumystary bastalmasa, bul brendter Reseı naryǵynan ketýi múmkin», – delingen avtodıler usynǵan habarlamada.
Svetlana Vınogradovanyń málimetinshe, parallel ımport arqyly ákelinetin jeńil kólikterdiń úlesi 2026 jyly 4%-ǵa deıin tómendeıdi. Buǵan Qytaıdyń eksporttyq shekteýleri áser etip otyr. Qazirgi ýaqytta parallel ımporttyń 80-85%-y Qytaıdan keledi.
Al GAC kompanııasynyń baspasóz qyzmeti óz kezeginde Reseı naryǵynan ketý jospary joq ekenin habarlady.
«Reseı naryǵy GAC brendi úshin strategııalyq mańyzǵa ıe. Kompanııanyń uzaqmerzimdi strategııasy ózgermeıdi», – dep málimdedi avtobrend ókilderi.
GAC ókilderi operatsııalyq qyzmet shtattyq rejımde júrip jatqanyn, barlyq mindettemeler oryndalyp otyrǵanyn jáne kompanııa dılerlik jelini ári servıs ınfraqurylymyn keńeıtýdi jalǵastyra beretinin atap ótti.
Buǵan deıin Reseıde ýtılalym mólsheri óskeni habarlanǵan edi.