GDR-diń qulaýyna áser etken bloknottaǵy jazbany satqan adamnyń esimi jarııalandy
ASTANA. KAZINFORM – Germanııanyń Bonn qalasyndaǵy Qazirgi tarıh mýzeıi sotta jeńilgennen keıin 2015 jyly ózine Berlın qabyrǵasynyń qulaýynda mańyzdy ról atqarǵan bloknot paraǵyn satqan adamnyń esimin jarııalady. Bul adam — burynǵy GDR azamaty Ýve K. bolyp shyqty, dep habarlaıdy DW.
Málimetke sáıkes, Ýve K. qujatty óziniń iskerlik seriktesi Tomas Shalk-Golodkovskııden alǵan. Al Tomas — GDR-diń syrtqy saýda mınıstrligi qyzmetkeriniń uly.
Nemistiń Bild basylymy birneshe jyl boıy mýzeıden osy jazbany satqan adamnyń esimin jarııalaýdy talap etken. Sebebi mýzeı bul qujat úshin 25 myń eýro tólegen, al satyp alý salyq tóleýshilerdiń qarajaty esebinen qarjylandyrylǵan. Mýzeı basshylyǵy bas tartqan soń, jýrnalıster Keln qalasynyń ákimshilik sotyna júgingen. Sot sheshimi boıynsha, baspasózdiń aqparat alý quqyǵy jeke derekterdi qorǵaý quqyǵynan basym dep tanyldy.
Áńgime bolyp otyrǵan qujat — GDR-di basqarǵan Sotsıalıstik birlik partııasy (SEPG) OK saıası bıýrosynyń múshesi Gıýnter Shabovskıdiń bloknotynan alynǵan bet. 1989 jylǵy 9 qarashada ol úkimettik baspasóz konferentsııasyn ótkizgen. Sol kezde jýrnalısterdiń biri Shabovskıden Shyǵys Germanııa azamattarynyń shetelge erkin shyǵýyna qatysty jańa erejeler qashan kúshine enetinin suraǵan. Ol jazbasyna ústirt qarap, «Meniń bilýimshe — dál qazir, kidirissiz» dep jaýap bergen. Osydan keıin myńdaǵan GDR turǵyndary shekaraǵa qaraı aǵylyp, abdyrap qalǵan shekarashylar ótkizý pýkterin ashqan. Nátıjesinde Berlın qabyrǵasy is júzinde qulady. Keıin belgili bolǵandaı, Shabovskıdiń josparynda zańnyń naqty kúshine ený ýaqyty múlde kórsetilmegen.
Eske sala ketsek, Germanııada kitapqa baılanysty iri qarjylyq qylmys ashyldy.
Sondaı-aq Germanııada Ekinshi dúnıejúzilik soǵys kezindegi bomba jarylyp, 58 adam jaraqat aldy.
