Gdanskiniń burynǵy ımamy Polshanyń Qazaqstandaǵy elshisi bolýy múmkin
ASTANA. QazAqparat - Qazaqstandaǵy Polshanyń jańa elshisi polshalyq-lıtvalyq tatardan shyqqan musylman Selım Hazbıevıch bolýy múmkin, dep habarlady «QazAqparat» HAA tilshisi.
Belgili ǵalym, qoǵam qaıratkeri Hazbıevıchtiń kandıdatýrasyn polshalyq Seım qaraýyna PR Syrtqy ister mınıstri Vıtold Vaşıkovskıı engizdi, dep atap ótti Gazeta.pl basylymy.
Osy qujatty saıasatker Robert Tyshkevıch Týıtterge jarııalady.
Jańalyqty Feısbýkte qazaqstandyq paıdalanýshylar talqylap jatyr.
«Rastalǵan jaǵdaıda, Selım Hazbıevıch myrza Polsha Respýblıkasynyń Astanadaǵy Tótenshe jáne Ókiletti Elshisi bolady. Ol jazýshy, pýblıtsıst, ǵylym doktory, professor. Onyń doktorlyq dıssertatsııasynyń taqyryby: - «20-shy ǵasyrdaǵy polsha musylmandarynyń ıdeologııasy», - dep jazdy «Venz» almatylyq polshalyq mádenıet ortalyǵynyń basshysy Oleg Chervınskıı wiadomosci.gazeta.pl-ge silteme jasap.
Internet-portaldyń habarlaýynsha, 2003 jylǵa deıin Selım Gdanskide musylman qoǵamynyń ımamy boldy.
Eske salsaq, 2015 jylǵy qazanda QR-daǵy PR Tótenshe jáne Ókiletti Elshisi bolyp osy laýazymda bir jyldan artyq jumys istegen Macheı Lang taǵaıyndalǵan.
