Gazpromnyń Orynbordaǵy zaýyty Qarashyǵanaq gazyn 2050 jylǵa deıin óńdeıtin boldy
ASTANA. KAZINFORM — Reseılik «Gazprom» JAQ pen Qazaqstan arasynda Qarashyǵanaq gazyn Orynbor zaýytynda óńdeý baǵasyn kóterip, merzimin 2050 jylǵa deıin uzartý týraly kelisim jasalǵan. Bul týraly «QazaqGaz» ulttyq kompanııasy» aktsıonerlik qoǵamynyń basqarma tóraǵasy Álibek Jamaýov «Samuryq-Qazyna» qory qoǵamdyq keńesiniń otyrysynda málim etti.
— Shynymen de 8 qazan kúni «Gazprom» jarııa aktsıonerlik qoǵamy men Qazaqstan Respýblıkasy arasynda mindetter júkteıtin kelisimderge qol qoıyldy. Qarashyǵanaqtan alynǵan gazdy aldaǵy 25 jyl boıy Orynbor zaýytynda óńdeý máselesi osy kelisim aıasynda pysyqtalǵan. Orynbordan óńdep ákeletin taýarlyq gaz halyqtyń úshten bir bóligin kógildir otynmen qamtamasyz etedi. Bul 7,3-7,5 mlrd tekshe metr gaz degen sóz, — dedi ol energetıka sarapshysy Nurlan Jumaǵulovtyń suraǵyna jaýap bere otyryp.
Álibek Jamaýov qyrkúıektiń basynda «Gazpromnyń» Orynbordaǵy zaýytynda bolǵanyn aıtady.
— Shyn máninde ol zaýyt óte eski. Qoldanysqa berilgenine 54 jyl bolǵan. Áne-mine shaǵylaıyn dep tur. Osyǵan baılanysty «Gazprom» bizge gaz óńdeý baǵasyn qaıta qaraýdy usyndy. Sonyń esebinen zaýytty 5-6 jyldyń ishinde jańǵyrtpaqshy. Sonyń arqasynda aldaǵy 25 jyl boıy Qarashyǵanaq gazyn óńdeýge qabyldap otyrýǵa bolady dep otyr. Biz soǵan kóndik, — dedi QazaqGaz basshysy.
Bul sheshimdi ol Qazaqstannyń ózinde gaz óńdeıtin qýat joqtyǵymen baılanystyrdy.
— Iá, óńdeý aqysy biraz artady. Biraq ózimizdiń basqa jobalarmen salystyrǵanda Orynbor usynyp otyrǵan baǵa anaǵurlym qonymdy. Mysaly, Jańaózende salynatyn zaýyt qazirdiń ózinde bir tekshe metr gaz óńdeýge 85 dollar surap otyr. Al Orynbor zaýyty usynǵan baǵany birden engizbeımiz. Aldaǵy 25 jylǵa «jumsaqtap» bólip tastadyq. Iá, bul kelisim QazaqGaz úshin taýarlyq gazdyń ózindik qunyna áser etedi. Biraq energetıkalyq qaýipsizdikti qamtamasyz etedi. Shıki gaz baǵasy ózgerissiz qalady, — dedi Álibek Jamaýov.
Aıta ketý kerek, Álibek Jamaýov sóz etken Orynbordaǵy gaz óńdeıtin zaýyt keıingi kezde Ýkraınanyń dron shabýylyna ushyrap qalyp júr. Mysaly, 19 qarasha kúni atalǵan zaýyt osyndaı shabýyl saldarynan Qarashyǵanaq ken ornynan shıkizat gaz qabyldaýdy ýaqytsha toqtatqan edi.
Qarashyǵanaqtan shyǵatyn gazdy Qazaqstan aýmaǵynda óńdeý týraly da osyǵan deıin kóp aıtyldy. Energetıka mınıstrligi Kazinform saýalyna joldaǵan jaýapta Qarashyǵanaq aktsıonerleri gaz óńdeý zaýytyn salýǵa Qazaqstannan qosymsha $1 mlrd talap etkenin aıtqan.
Keıin atalǵan jobanyń keleshegine qatysty túpkilikti sheshim qazan, qarasha aılarynda qabyldanatyny málim bolǵan edi.
Sońǵy ret Energetıka mınıstri Erlan Aqkenjenov Qarashyǵanaq gaz óńdeý zaýytyn salý úshin keminde 2,5 mlrd dollar ınvestıtsııa kerektigin aıtqan bolatyn.