«Gazprommen» Qazaqstannyń shyǵysyn gazdandyrý kelissózi áli toqtaǵan joq — Energetıka mınıstrligi

ASTANA. KAZINFORM — Energetıka mınıstrligi Kazinform saýalyna joldaǵan jaýapta Pavlodar, Abaı, Shyǵys Qazaqstan oblystaryn Reseıden Qytaıǵa tartylatyn tranzıttik qubyr arqyly gazdandyrý kelissózi qaı satyda ekenin málim etti. 

Eske salsaq, áleýmettik jeli men keıbir BAQ-ta CNPC kompanııasy men «Gazprom» kompanııasy Reseı gazyn Qytaıǵa Mońǵolııa aýmaǵy arqyly tasymaldaýdy uıǵarǵanyn, osylaısha Qazaqstannyń úsh birdeı oblysyn «Gazprom» jobasynyń aıasynda gazdandyrý nusqasy kelmeske ketkenin jazǵan bolatyn.

Energetıka mınıstrligindegiler Reseı tarapy Qazaqstanǵa bul nusqadan bas tartatyndaryn resmı habarlamaǵanyn aıtyp otyr.

— Qazirgi tańda Reseı Federatsııasy tarapynan resmı túrde elimizdiń soltústik-shyǵysy arqyly Qytaı memleketine gaz tranzıtteý jobasy týraly aqparat jarııalanbady.

Óz kezeginde mınıstrlik elimizdiń soltústik-shyǵys óńirlerin gazdandyrý boıynsha Úkimet pen «Gazprom» JAQ arasynda qol qoıylǵan jol kartasy sheńberinde Reseı Federatsııasynan gaz jetkizý úshin «Gazprom» JAQ-pen kelissózder júrgizip jatyr, — delingen resmı málimette.

Mınıstrliktegiler Shyǵys Qazaqstan, Abaı jáne Pavlodar oblystarynda jalpy 1 053 eldi mekendi jáne ondaǵy 2 mıllıonnan astam adamdy tabıǵı gazben qamtamasyz etý kózdelgenin aıtady.

— Sonymen qatar, osy óńirler tutynýshylarynyń 2040 jylǵa deıin taýarlyq gazdy tutynýynyń boljamdy kólemderi bar. Tutyný kólemi 2040 jylǵa qaraı jylyna 4,9 mlrd tekshe metr deńgeıinde aıqyndalǵan. Naqtylanǵan kórsetkishter jobalaý barysynda jáne de jańa tutynýshylardyń paıda bolýyna baılanysty aıqyndalady, — dep jazylǵan mınıstrlik jaýabynda.

Eske salsaq, Senattyń jalpy otyrysynda Palata tóraǵasy Máýlen Áshimbaev Túrikmenstannan gaz satyp alý máselesine toqtalǵan bolatyn.