«Gazprom» «Qyrǵyzgaz» aktsııalarynyń 100 paıyzyn satyp aldy
BІShKEK. QazAqparat - Beısenbi, 10 sáýirde Bishkekte «QyrǵyzgazProm» men Reseıdiń «Gazprom» AAQ arasynda jarǵylyq kapıtalda aktsııalarynyń 100 paıyzyn satyp alý-satý kelisimine qol qoıyldy.
Kelisim «Ala-Arsha» memlekettik rezıdentsııasynda «Gazprom» basqarma basshysy Alekseı Mıller men «Qyrǵyzgaz» AAQ bas dırektory Turǵynbek Qulmyrzaev arasynda jasaldy.
Atalǵan kelisimshartqa 2013 jyly Máskeýde eki eldiń energetıka mınıstrleriniń arasyndaǵy «Qyrǵyzstan men Reseı úkimetteri arasyndaǵy QR aýmaǵynda tabıǵı gazdy tasymaldaý, taratý jáne júzege asyrý salasyndaǵy yntymaqtastyq kelisimine» sáıkes qol qoıyldy. Kelisim ulttyq parlamenttermen bekitilip, 2014 jyldyń 17 aqpanynda kúshine endi.
«Gazprom» AQ Qyrǵyzstanda tutynýshylarǵa gazdy turaqty jáne úzdiksiz jetkizip turýǵa mindettenip otyr, dep málimdedi Bishkekte Alekseı Mıller. Ol Qyrǵyzstan prezıdenti Almazbek Atambaevpen kezdesýi barysynda kompanııanyń aldynda turǵan maqsattary men mindetteri talqylanǵanyn aıtty.
