Halyq qaharmany Ǵazız Baıtasovtyń uly: ákemniń jolyn jalǵaǵym keledi
ASTANA. KAZINFORM — Mádenıet jáne aqparat mınıstrliginiń qoldaýymen «Sháken Aımanov atyndaǵy «Qazaqfılm» kınostýdııasy men «Ulttyq kınony qoldaý memlekettik ortalyǵy» birlese otyryp, batyrdyń qurmetine «Kapıtan Baıtasov» kórkem fılmin túsirdi.
Fılm 23 qazannan bastap úlken ekranǵa shyǵady. Bul týraly Jibek Joly telearnasynyń «Búgin live» baǵdarlamasynda habarlandy.
Fılm shynaıy oqıǵaǵa negizdelgen. Stsenarıı jazý barysynda rejısser Taraz qalasyna baryp, Ǵazız Baıtasovtyń otbasymen jáne áriptesterimen kezdesti.
— Joba bastalǵaly beri rejısserimiz Tarazǵa baryp, batyrdyń otbasy men ekstremızmge qarsy kúreskerlermen keńesip, jumys istedi. Ómirden alynǵan faktilerge súıene otyryp stsenarıı jazyldy. Bul jumystar bir jyl buryn bastalǵan bolatyn. Bul oqıǵa óskeleń urpaqqa tanystyrylady degen maqsat bar. Fılmde organıkalyq sahnalar, ekshn, atys-shabys bar, bul bizge erekshe qyzyq boldy, — dedi akter Qobylandy Bolat.
Sonymen qatar efır barysynda Ǵazız Baıtasovtyń uly Ádiljan Baıtasovpen suhbat ótti.
— Bul fılmniń jaryq kórýi bizge úlken abyroı men qýanysh syılaıdy. Ákemniń erligi eshqashan umytylmaı, dáriptelip keledi. Halyq aýzynda bolýy bizdiń otbasymyzdy shyn júrekten qýantady. Fılm túsirilimine rejısserlik qurammen birge basynan aıaǵyna deıin qatystym. Fılmniń jaryqqa shyǵýyna óz úlesimdi qostym, — dedi Ádiljan Baıtasov.
Ol sondaı-aq aǵasynyń Jambyl oblysy prokýratýrasynda qyzmet etip jatqanyn, al óziniń QazUÝ zań fakýltetinde quqyqtaný mamandyǵy boıynsha bilim alyp jatqanyn aıtyp ótti.
— Men ákemniń jolyn jalǵastyrýdy maqsat tutamyn, — dedi Ádiljan Baıtasov.
Eske sala keteıik, 2011 jyly 12 qarashada Taraz qalasynda qarý-jaraq dúkenine jasalǵan qarýly shabýyl saldarynan turǵyndar zardap shekken edi. Bul qaraly oqıǵa halyq jadynda polıtsııa kapıtany Ǵazız Baıtasovtyń esimimen máńgi qaldy. Ol qylmyskerdiń qolyndaǵy granatany halyqqa qaraı laqtyrýǵa jol bermeı, óz denesimen jaýyp, erlikpen qaza tapty. Osy erligi úshin Ǵazız Baıtasovqa Qazaqstannyń Halyq qaharmany ataǵy berildi.