Ǵazız Baıtasov jaıly kórkem fılm bıyl kórermenge jol tartady
ALMATY. KAZINFORM — Bıyl otandyq 10 fılm prokatqa shyǵady. Bul týraly Mádenıet jáne aqparat mınıstriliginiń Kazinform saýalyna joldaǵan jaýabynda aıtylǵan.
— Osy jyly naqty oqıǵaǵa negizdelgen jol polıtsııasy batalonynyń 1-shi vzvod komandıri, polıtsııa kapıtany Ǵazız Baıtasovtyń erligi týraly «Kapıtan Baıtasov» fılmi kórermenge jol tartady. Ǵazız Baıtasov 2011 jylǵy 12 qarashada óz ómiriniń baǵasymen qylmyskerdi óz denesimen jaýyp, Taraz qalasynda terrorıstik aktini toqtatty, — dep atap ótti mınıstrlikten.
Aıta ketsek, marqum Ǵazız Baıtasov — Qazaqstandaǵy eń joǵary dárejeli «Halyq qaharmany» ataǵyna ıe bolǵan alǵashqy polıtsııa qyzmetkeri.
Eske salsaq, osydan 14 jyl buryn Tarazda lańkesterdiń qylmysy saldarynan 7 adam qaza tapqan, onyń beseýi — polıtsııa qyzmetkeri, ekeýi — azamattyq tulǵa.
Polıtsııa kapıtany Ǵazız Baıtasov sol atys kezinde adamdardy qutqarý úshin granatasy bar lańkestiń jolyn kesti, sóıtip qaza tapty.
Vedomstvodan málim etkendeı, jalpy 2025 jyly prokatqa 10 fılm shyǵady.
— Bıyl ótken jyldary túsirilgen 10 ulttyq fılmdi keń prokatqa shyǵarý josparda. «Juldyz» fılmi — ol ǵasyr problemasy, qazirgi qoǵamnyń patologııasy, álemdik tendentsııaǵa aınalyp, vırýs retinde taralyp jatqan lýdomanııa men oıynǵa táýeldilik týraly áleýmettik drama. Sondaı-aq «90+1», «Qara qyz», «Osennıı brız», «Qaitadan», «Aromatnoe serdtse», «Ábil» kórkem fılmderi men «Altyn adam» anımatsııalyq kartına. Osy jyldyń basynda prokatqa shyqqan «Tezek», «Fake-ovyı Arman» kartınalary óz kórermenderin taýyp úlgerdi, — delingen habarlamada.
Sonymen qatar, memleket esebinen túsirilip jatqan 16 kınojoba bar.
Mádenıet jáne aqparat mınıstrligi qoldanystaǵy zańnamaǵa sáıkes ulttyq fılmderdi túsirýge qoldaý kórsetý úshin ár jyldyń basynda basym taqyryptardy bekitedi.
— Osy jyly Mádenıet jáne aqparat mınıstrligimen bekitilgen basym taqyryptar qataryna «Otan, týǵan jerge degen súıispenshilik», «Otbasy (ata, áje, áke men ana beınesin ashý, tárbıeni dáripteý)», «Tarıh pen taǵylym», «Jumysshy mamandyqtaryn tanymal etetin kıno», «Qazaq ertegileri men epostary», «Balalarǵa arnalǵan fılmder», «Tulǵalar (tanymal tarıhı tulǵalar týraly fılmder)», «Qorshaǵan orta, tabıǵatty qorǵaý», «Áskerı-patrıottyq kıno», «Zań men tártip», «Salaýatty ómir saltyn, sportty nasıhattaıtyn kıno», «Birlik pen beıbitshilik», «Ǵarysh pen ǵalam», «Áıel quqyǵy, bala qaýipsizdigi», «Ulttyq qundylyqtar», «Týǵan jerdiń kórkem tabıǵaty», «Adal azamat», «Dos qadiri», «Bilimdi urpaq», «Tarıhtaǵy eleýli oqıǵalar», «Ǵylymı jetistik», «Qumarlyq pen táýeldilik» endi, — delingen mınıstrlik jaýabynda.
Buǵan qosa, 2024 jyly ulttyq fılmderdi memlekettik qarjylandyrýdyń tıimdiligin, ashyqtyǵyn jáne rentabeldiligin qamtamasyz etý maqsatynda kınojobalardy konkýrstyq irikteýdiń jańa erejeleri bekitilgen bolatyn.
Jańa erejege sáıkes aldymen mınıstrlik bekitken basym taqyryptarǵa stsenarııler qabyldanyp, quzyretti saraptama keńesiniń qaraýyna joldanady.
— Sońǵy 2 jylda otandyq fılmder úlesi artyp keledi. 2023-2029 jyldarǵa arnalǵan tujyrymdamaǵa sáıkes 2030 jylǵa qaraı kınoprokattaǵy otandyq fılmderdiń úlesi 35%-ǵa deıin ulǵaıtylady. Máselen, 2023 jyly kınoprokattaǵy otandyq fılmderdiń úlesi 19,2% (79 fılm) jáne 2024 jyly 22,9% (94 fılm). 2024 jyly prokatqa shyqqan otandyq 94 fılm 22 mlrd teńge shamasynda kassalyq tabys tapty. Fılmderdi prokattaýdan kelip túsken negizgi tabys otandyq jeke kınostýdııalar, dıstrıbıýtorlar men kınoteatrlarǵa tıesili, — dep túsindirdi vedomstvodan.
Osyǵan deıin Mádenıet jáne aqparat mınıstri Aıda Balaeva kınoteatrlarda kórsetiletin fılmderdiń mazmunyna baqylaý kúsheıetinin aıtqan edi.
Sondaı-aq, Úkimet basshysy Oljas Bektenov elimizde fılmnen túsetin paıdanyń kóbi kınoteatr ıeleriniń qaltasynda qalatynyn aıtqan bolatyn.