Gazıantepten oralǵan qazaqstandyqtar zilzala týraly estelikterin aıtty
Jolaýshylardyń biri – almatylyq Marına Fargeeva Túrkııada bilim alyp jatqan nemeresine qydyryp barǵan. Onyń ekinshi nemeresiniń aıaǵyna zaqym tıip, elge baldaqpen jetti.
«Árıne, jer silkinisi qorqynyshty nárse, qazir úıimizge aman jetkenimizge qýanyshtymyz. Meniń nemerem Túrkııadaǵy medıtsınalyq ýnıversıtette oqıdy. Ekinshi nemeremdi alyp, qonaqqa barǵanbyz. Instıtýtta nemereme Qazaqstan elshiligine júginý kerektigi aıtyldy. Sondyqtan biz elshige óte rızamyz. Ol barlyq suraqtarymyzǵa jaýap berdi, bárin tez jasady. Qazir Otanymyzǵa keldik. Kómek úshin rahmet aıtamyz», - dedi Marına Fargeeva elorda áýejaıynda tilshilerge bergen suhbatynda.
Taǵy bir otandasymyz Asadýlla Arystanov Gazıantep qalasyna jeke jumysymen, bıznespen aınalysýǵa kelgen. Ol Iran men Túrkııadan toqyma buıymdar men kilemder ákep satady.
«Birinshiden, men elimizdiń Prezıdenti Qasym-Jomart Toqaevqa alǵysymdy bildiremin. Qazaqstannyń Túrkııadaǵy elshisi Erkebulan Sápıevke de alǵys aıtqym keledi. Biz rasynda da qıyn jaǵdaıda qaldyq. Konsýldyqtyń resmı saıtyna kirip, dıplomatııalyq ókildik qyzmetkeriniń nómirin taptyq. Olar bizge birden jaýap berdi. Bir qońyraýdan keıin Qazaqstannyń Túrkııadaǵy elshiliginiń qyzmetkerleri habarlasyp, evakýatsııany uıymdastyrdy. Bizge jol kórsetip, qaıda kútetinin túsindirdi. Azamattaryn qıynshylyqta qaldyrmaı, eline aman-esen jetkizgeni úshin Prezıdent pen elshilikke alǵysymyzdy bildiremiz», - deıdi Asadýlla Arystanov.
Almatylyq Raıhan Nabıeva Gazıantepte turatyn týystaryna qonaqqa barǵan jáne sonda úsh aı turýdy josparlaǵan.
«Alaıda jer silkinisi meniń josparlarymdy ózgertti. Maǵan kómektesken Túrkııanyń Qazaqstandaǵy elshiliginiń qyzmetkerlerine rahmet, aman-esen elime jettim. Jıenim Almatyda polıtsııada jumys isteıdi. Ol maǵan kómektesti, qyzmetkerlermen, qutqarýshylarmen habarlasty. Barsha qazaqstandyqtarǵa rahmet. Bári jaqsy, ýaqytynda qutqaryldy, jaqsy ushty. Jer silkinisi bolǵan kezde qonaqta otyr edim. Estigen boıda kóshege júgirip shyǵyp, tańǵa deıin kólikterde otyrdyq. Qurban bolǵandar kóp boldy. Alla barlyǵyna járdem bersin», - dedi Raıhan Nábıeva.
Túrkııadan arnaıy ushaqpen kelgen Qazaqstan azamattarynyń arasynda farmatsevt Ermek Bısenbaev pen Elena Lı de boldy. Olar Gazıantepke issaparmen barǵan.
«Biz farmatsevtıkalyq kompanııadanbyz. Gazıantepke issaparmen bardyq. Barlyǵy kóz aldymyzda boldy, mundaı jer silkinisin ómirimizde birinshi ret kórdik. Qudaıǵa shúkir, osy ýaqyt ishinde elshilik qyzmetkelerimen baılanysta boldyq. Olar bizge jan-jaqty qoldaý kórsetti. Qazaqstannyń Túrkııadaǵy Elshiligine alǵysymyzdy bildirgimiz keledi. Gazıantepke elshi Erkebulan Sápıevtiń ózi kómekshisimen birge keldi. Olar bizdiń Tótenshe jaǵdaılar mınıstrliginiń delegatsııasymen birge boldy, olardy qarsy aldy, bizdi evakýatsııalaýdy uıymdastyrdy. Ol jerde reıster toqtatyldy. Biz sonda qansha bolatynymyzdy bilmedik. Biraq Elshiligimizdiń arqasynda arnaıy ushaqpen usha aldyq», - dedi farmatsevt Ermek Bısenbaev.
Elena Lıdiń aıtýynsha, jer asty dúmpýin sezgennen keıin bes farmatsevtten turatyn top dereý qujattaryn jınap, kıinip, kóshege júgirip shyqqan.
«Biz qonaq úıde boldyq. Shyndyǵynda, biz túnde kelgendikten, ahýaldy birden túsine qoımadyq. Bizdiń komandanyń bir bóligi Almatydan, bir bóligi Ámirlikten ushyp keldi. Qatty sharshadyq. Kóptegen adamdar sábılerimen jalańaıaq dalada júrdi. Qar eki saǵattan astam ýaqyt jaýdy. Barlyǵy syrtta turyp, jer asty dúmpýiniń basylýyn kútip turdy», - dep bólisti Elena Lı.
Sondaı-aq, Qazaqstannyń arnaıy ushaǵymen qyrǵyzstandyq erli-zaıypty Janat pen Aıbóbek keldi. Olar Gazıantepte turady jáne jumys isteıdi. Onyń áıeli Shymkentte týyp-ósken. Sondyqtan erli-zaıyptylar Astanaǵa arnaıy bortpen keldi. Sodan keıin olar Shymkentke, ári qaraı Bishkekke barýdy josparlap otyr.
«Bul meniń alǵashqy tájirıbem, zilzalany birinshi ret kórýim. Bizdiń elde jer silkinisi 3-5 sekýndqa sozylatyn, al onda bir jarym mınýt boıy qozǵalyp turdy. Onyń ústine tańǵy tórtte shyrt uıqyda jatqan edik. Úıimizde jaryqshaq paıda boldy, tolyq qıraǵan joq, óıtkeni salystyrmaly túrde jańa ǵımarat edi», - dep eske aldy Janat.
Foto: Anadolý Agenttigi
