Gazıantepte zilzaladan qatty zardap shekken Nurdaǵy aýdanynyń meri ustaldy

ASTANA. QazAqparat – Túrkııanyń ońtústigindegi Gazıantep qalasynda zilzaladan qıraǵan ǵımarattar isin tergeý aıasynda Nurdaǵy aýdanynyń meri Okkesh Kavak ustaldy, dep habarlaıdy QazAqparat túrikshe BBC saıtyna silteme jasap.

«Epıortalyǵy Kahramanmarash qalasynda bolǵan jer silkinisinen irgeles óńirlerde 2 000-ǵa jýyq ǵımarat qırandyǵa aınaldy, júzdegen adam qaza tapty. Provıntsııada jer silkinisine baılanysty qylmystardy tergeý barysynda 22 adam qamaýǵa alyndy. Gazıanteptegi qıraǵan ǵımarattar isin tergeý aıasynda Nurdaǵy aýdanynyń meri Okkesh Kavak ustaldy. Demirören aqparat agenttigi taǵy 80 adamdy qamaýǵa alýǵa order shyǵarylǵanyn habarlady», - dep jazylǵan túrikshe BBC saıtynda.

Buǵan deıin habarlanǵanyndaı, Tabıǵı apattardy basqarý jáne tótenshe jaǵdaılar agenttiginiń (AFAD) málimeti boıynsha joıqyn jer silkinisi saldarynan 44 218 adam qaza tapqan.

Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı málim etkendeı, jer silkinisinen qıraǵan jáne qulaý aldynda turǵan 156 myń ǵımarat anyqtaldy.

Jer silkinisi bolǵan provıntsııalardyń prokýratýralary qıraǵan nysandardyń qurylysyna qatysy bar degen kúdikpen 6 aqpannan beri 564 adamdy ustady.

Hataıda jer silkinisi kezinde qulaǵan Rönesans Rezidans turǵyn úı kesheniniń sáýletshisi Mehmet ıAshar Koshkýn Ystanbul áýejaıynda ustaldy. Ol shetelge qashpaq bolǵan.

Aıta keteıik, búgin Túrkııanyń ońtústiginde 4,4 baldyq jer silkindi.