Gazıantep turǵyndary qazaqstandyq qutqarýshylarǵa alǵys aıtýda

ASTANA. QazAqparat – Gazıantep qalasynyń turǵyndary qazaqstandyq qutqarýshylarǵa zilzala saldaryn joıýǵa kómekteskeni úshin alǵys aıtýda, dep habarlaıdy QazAqparat tilshisi.

«Baýyrlas qazaq halqyna jáne Qazaqstan Respýblıkasyna bizdiń Gazıantep qalasynyń turǵyndaryna kómekteskeni úshin alǵys aıtqym keledi. Qazaqstannan kelgen qutqarýshylar Gazıantepke kelgen soń birden jumysqa kirisip, úıindilerdi tekserýdi, zardap shekkenderdi qutqarýdy jalǵastyrýda. Men osy eki qıraǵan ǵımarattyń biriniń turǵynymyn, qıraǵan úıden shyǵyp úlgerip, janym aman qaldy. Qazaqstandyq qutqarýshylarǵa alǵys aıtqym keledi. Alla razy bolsyn», - dedi Gazıantep turǵyny.

Sonymen birge Gazıantep órt sóndirýshisi de qazaqstandyq qutqarýshylardyń kásibıligin atap ótti.

«Qazirgi ýaqytta biz qazaq baýyrlarmen birge jumys istep jatyrmyz. Olar óte tájirıbeli, óz isiniń kásibı mamandary. Qazaqstandyq qutqarýshylardyń izdestirý-qutqarý jumystary muqııat jáne erekshe baqylaýmen júrgizilýde. Kómek úshin kóp rahmet», - dedi ol.

Aıta ketsek, buǵan deıin qazaqstandyq qutqarýshylardyń alǵashqy legi jer silkinisi saldaryn joıýǵa kómek kórsetý úshin Almatydan Túrkııaǵa attandy.

Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Sońǵy málimet boıynsha Túrkııadaǵy eki joıqyn jer silkinisinen qaza tapqandar sany 5834-ke jetti, 34 810 adam jaraqat aldy.

Vıdeodan alynǵan kadr