Gazhımııa salasy óńir ekonomıkasynyń draıverine aınalýy tıis – BQO ákimi
ORAL. QazAqparat – Gazhımııa salasy óńir ekonomıkasynyń draıverine aınalýy tıis. Bul týraly oblystyq máslıhat depýtattary aldynda esep bergen oblys ákimi Ǵalı Esqalıev málim etti, dep habarlaıdy QazAqparat tilshisi.
Ákimniń aıtýynsha, Memleket basshysy bıylǵy 2 qyrkúıektegi Joldaýynda Qazaqstannyń batys óńirleri munaı-hımııa keshenderin salyp, joǵary deńgeıdegi qaıta óńdeý isiniń jańa tsıkldaryn qurý úshin ınvestıtsııa tartatyn ortalyqqa aınalýy tıis ekendigin atap kórsetken bolatyn.
«Óńir úshin bul óte mańyzdy, óıtkeni negizi munaı jáne gaz ónimderi bolyp tabylatyn taý-ken óndirisi ishki aımaqtyq ónimniń 40 paıyzdan astamyn quraıdy. Bul biz úshin úlken múmkindik. Bolashaqta gazhımııa salasy óńir ekonomıkasynyń draıverine aınalýy tıis», dedi Ǵ.Esqalıev.
Qazirdiń ózinde «Jaıkpetrolıým» JShS metanol óndiretn gazhımııa keshenin salý jobasyn bastady.
Jalpy, bıylǵy segiz aıdaǵy ónerkásip ónimi kólemi ótken jylǵydan 2,4 paıyzǵa ósip, 1,2 trln teńgege jetti. Bul ótken jyldyń osy kezeńimen salystyrǵanda, taý-ken ónerkásibi ónimi kóleminiń 471 mlrd jáne óńdeý ónerkásibi óniminiń 1,7 mlrd teńgege ósýi arqasynda múmkin boldy.
Óńdeý ónerkásibinde koronavırýsqa baılanysty reseılik kásiporyndar satyp alatyn ónim kóleminiń ýaqytsha kemýine oraı metallýrgııa 15,1 jáne mashına jasaý 7,9 paıyzǵa azaıdy.
Degenmen daıyn metall buıymdary, qurylys ındýstrııasy, azyq-túlik, munaı óńdeý, hımııa ónerkásibi, rezeńke jáne plastmassa buıymdar kólemi ósti.
Elbasy tapsyrmasyna sáıkes oraldyq zaýyttardy tapsyryspen qamtý máselesi sheshildi. Aıtalyq, «Oral «Zenıt» zaýyty», «Batys Qazaqstan mashına jasaý kompanııasy» AQ, «Gıdroprıbor» ǴZI» AQ 10 mıllıardtaı teńgege memlekettik qorǵanystyq tapsyrys aldy. Bul da – memleket tarapynan jasalyp otyrǵan qoldaý.
Oblys basshysy basqa da salalarda atqarylǵan jumystarǵa toqtalyp, sonymen qatar aldaǵy ýaqytta júzege asyrylatyn joba-josparlardyń da az emestigin atap kórsetti.
Sýretterdi túsirgen Rafhat Halelov
