Gazettiń ınternet-saıtynyń damýy tırajǵa qalaı yqpal etedi
ASTANA. QazAqparat - «Egemen Qazaqstan» AQ basqarma tóraǵasy Darhan Qydyráli basylym saıtynyń tırajǵa qalaı yqpal etkenin túsindirip berdi, dep habarlaıdy QazAqparat tilshisi.
Onyń aıtýynsha, «Egemen Qazaqstan» gazetiniń saıty derbes redaktsııa retinde jumys isteıdi jáne basylymnyń keńirek nasıhattalýyna yqpal etip otyr.
«Byltyr «Nıý-Iork Taımstyń» strategııasyn oqyǵanym bar edi, sonda gazet basshylyǵy aıtady: eger ınternet-redaktsııa jaqsy jumys istese, bul gazettiń tırajynyń kemýine emes, kerisinshe, aýdıtorııasynyń artýyna yqpal etedi. Japonııadaǵy «Asahıge» barǵanda da suradyq, olar da amerıkalyq áriptesteriniń sózin qaıtalady. (...) Bizdiń saıttyń strategııasy negizinen jedel jáne senimdi aqparat taratýǵa baǵyttalǵan. Biz qazir aǵylshyn, orys, latyn jáne arab qarpindegi nusqalarymyzben redaktsııaǵa úlken oqyrmandar aýdıtorııasyn tartyp otyrmyz. Bul gazet tırajynyń kemýine emes, kerisinshe, ósýine yqpal etip otyr. Sebebi, «Egemenniń» ózgergenin saıttan kórip, gazetimizge bet burǵan jańa oqyrmandarymyz kóp», - dedi Darhan Qydyráli Ortalyq kommýnıkatsııalar qyzmetinde ótken baspasóz máslıhatynda.
Darhan Qydyráli «Egemen Qazaqstan» saıty men gazetiniń aqparattyq saıasaty eki túrli ekenin jáne birin-biri qaıtalamaıtynyn atap ótti.
«Jalpy, zertteýler bizge ınternet-saıttaǵy materıaldy adamnyń 40 sekýndqa deıin ǵana oqı alatynyn, gazetti 40 mınýtqa deıin oqıtynyn kórsetti. Qaǵazdy ustap oqý adamnyń qabyldaýyna da basqasha áser etedi, gazetten oqý ınternetten bólek. Internet arqyly kóbinese jedel aqparat alamyz, al endi salıqaly, sapaly saraptamalardy, qundy materıaldardy adamdar kóp jaǵdaıda gazet arqyly oqıdy. Sondyqtan saıtymyzda jedel aqparat taratýǵa, gazette - qundylyǵyn joımaıtyn salıqaly saraptamalyq materıaldarǵa kóbirek kóńil bólip otyrmyz», - dep óz sózin tolyqtyrdy ol.
Atap ótken jón, 2017 jyly «Egemen Qazaqstan» gazeti tıraj sany boıynsha (204 myń) Qazaqstan basylymdary arasynda eń joǵary kórsetkishke qol jetkizgen. 2018 jylǵa jazylym naýqanynda - Qazposhta boıynsha kórsetkish 206 myńnan asqan.
