Gazet-jýrnal tasymalyn sýbsıdııalaý quzyreti Mádenıet mınıstrligine berilmeıdi — Bektenov
ASTANA. KAZINFORM — Premer-mınıstr Oljas Bektenov Senat depýtatynyń «Qazposhtanyń» shyǵyndaryn bıýdjet esebinen sýbsıdııalaý máselesi týraly saýalyna jaýap joldady.
Jaýapta gazet-jýrnaldardy eldi mekenderge jetkizý shyǵyndaryn sýbsıdııalaý Jasandy ıntellekt jáne tsıfrlyq damý mınıstrliginde qala beretini aıtylǵan.
— Qazir merzimdi baspa basylymdaryn jetkizýdi sýbsıdııalaý jónindegi quzyretti Mádenıet jáne aqparat mınıstrligine berý máselesi qarastyrylmaıdy. Óz kezeginde, «Mass-medıa týraly» Qazaqstan Respýblıkasynyń Zańyna sáıkes baspa buqaralyq aqparat quraldaryn memlekettik qoldaý memlekettik emes buqaralyq aqparat quraldaryna granttar berý, sondaı-aq memlekettik aqparattyq tapsyrys arqyly júzege asyrylady. Jalpy Úkimet «Qazposhta» AQ-nyń qarjylyq turaqtylyǵyn arttyrýǵa jáne poshta ınfraqurylymyn damytýǵa, onyń ishinde 2028 jyly IPO ótkizýge baǵyttalǵan sharalar keshenin iske asyrýdy jalǵastyrýda, — delingen jaýapta.
Oljas Bektenov byltyr bıýdjetten «Qazposhtaǵa» 2 mlrd teńge sýbsıdııa berilgenin atap ótken.
— Aǵymdaǵy jyly aýyldyq jerlerde poshta baılanysynyń ámbebap qyzmetterin kórsetý boıynsha operatorlardyń zalaldaryn sýbsıdııalaýǵa 500 mln teńge kózdelgen. Sonymen qatar, Jasandy ıntellekt jáne tsıfrlyq damý mınıstrligi poshta baılanysynyń ámbebap kórsetiletin qyzmetterine qosymsha qajettilik boıynsha 2,8 mlrd teńge somasyna bıýdjettik ótinimdi qalyptastyrdy. Ony Bıýdjet kodeksinde belgilengen tártippen ýákiletti organdar qaraıtyn bolady, — dep jaýap berdi Premer-mınıstr.
Jaýapta Ulttyq bank «Qazposhtanyń» shalǵaı aýyldarǵa aqsha jetkizýge ketken shyǵyndaryn óteı bastaǵany da aıtylǵan.
— «Poshta týraly» Zańǵa «Qazposhta» AQ-nyń aýyldyq eldi mekenderge qolma-qol aqsha jetkizýge jumsaǵan shyǵyndaryn óteýdi kózdeıtin ózgerister engizildi. Osy tetik aıasynda aǵymdaǵy jyldyń aqpan aıynda Ulttyq bank tarapynan «Qazposhta» AQ-nyń 2025 jyl boıynsha 3,5 mlrd teńge somasynda shyǵystary óteldi, — deıdi Úkimet basshysy.
Jalpy depýtattar gazet-jýrnaldy halyqqa keshiktirmeı jetkizý, poshta qyzmetkerleriniń jalaqysyn ósirý máselesin arakidik kóterip júr.