Gazet shyǵarýdy kirpish shyǵarý isimen bir deńgeıde qaraýǵa bolmaıdy - Marat Toqashbaev
ALMATY. 3 tamyz. QazAqparat /Erlik Erjanuly/ - Rýhanııat máselesi men materıaldyq ónim óndirýdi bir deńgeıde qarastyrýǵa bolmaıdy. Bul búgin Almatyda ótken baspasóz máslıhatynda aıtyldy.
«Gazet shyǵarýdy kirpish shyǵarýmen bir deńgeıde qoıý durys emes. Sondyqtan « Memlekettik satyp alý týraly» zańǵa ózgerister engizý kerek. Bul quqyq úkimet pen depýtattardyń qolynda. Bastamashy top kitap shyǵarý, buqaralyq aqparat quraldaryn qarjylandyrý isin osy zańnyń aıasynan shyǵaryp alý kerek. Nemese memleketten sýbsıdııa arqyly qarjylandyrý týraly jańa baptar qosylý kerek», - deıdi «Prezıdent jáne Halyq» gazetiniń Bas redaktory Marat Toqashbaev.
Kósemsóz sheberiniń aıtýynsha, aldaǵy jyldan bastap memlekettik satyp alý tenderi elektrondyq júıe arqyly ótpek. Úmitkerler óz keńsesinde otyryp tender kezinde tómen baǵa usynýdan jarysqa túspek. Bul úlgi materıaldyq ónimderge keletin shyǵar, al rýhanı dúnıege sáıkes kelmeıdi.
