Gazet ólmes úshin basqalar jazbaǵan máselelerdi qozǵaýy tıis - Nurmuhamed Baıǵaraev

NUR-SULTAN. QazAqparat - Gazette ózekti máseleler jan-jaqty zerttelip jazylyp jatyr. Tek qana oqý kerek. Elordada ótken qazaqtildi onlaın kontent jasaýshylardyń forýmynda osyndaı pikir aıtyldy, dep habarlaıdy QazAqparat tilshisi.

«Tehnologııa gazetti óltiredi degen pikir durys emes. «Gazet tiri qalýy úshin ne isteý kerek?» degen suraqqa jaýap kerek bolsa, birinshiden otandyq gazetterde salmaqty, zertteý maqalalar shyǵyp jatyr. Ekinshiden, «Men qazaqpyn», «Qazaq dástúri» sııaqty taqyryptardan ketti. Gazetterdi oqysańyz, jasandy ıntellekt, 5G, tórtinshi ındýstrııanyń artyqshylyqtary men múmkinshilikteri jáne basqa da ózekti máseleler tarqatylyp jazylyp jatyr. Tek qana oqý kerek», - deıdi «Aıqyn» gazetiniń bas redaktory Nurmuhamed Baıǵaraev.

Onyń aıtýynsha, qazirgi ýaqytta gazetter aptasyna bir ret qana shyqpaıdy.

«Mysaly, «Egemen Qazaqstan» gazeti aptasyna bes ret, «Aıqyn» gazeti aptasyna tórt ret shyǵady. Televıdenıede jańalyqtar kúnine 4-5 ret beriledi. Jyldamdyq jaǵynan saıttarǵa ilese almaǵanmen, ımpýls berýge tyrysady. Gazet «tiri» qalýy úshin naryqtaǵy básekelesterinde joq nárseni berýi kerek. Basty básekeles - saıttar men dástúrli emes akkaýnttar bolýy múmkin. Gazetter bir kúnde bolǵan, jıi talqylanyp jatqan máselelerdi jan-jaqty zerttep jazýy tıis. Gazette damýdyń basqa baǵyty joq. Ekinshiden, gazet óziniń tsıfrlyq medıasyn damytýy kerek», - deıdi ol.

Foto: aqmeshit-zhastary.kz