Gazdyń baǵasy munaı baǵasymen tyǵyz baılanysty – energetıka mınıstri

NUR-SULTAN. QazAqparat – QR Energetıka mınıstri Maǵzum Myrzaǵalıev suıytylǵan gaz baǵasynyń naryq retteıtin baǵasy qansha bolý kerektigi týraly pikir bildirdi, dep habarlaıdy QazAqparat tilshisi.

Bul týraly ol ortalyq kommýnıkatsııalar qyzmetinde ótken brıfıngide aıtty.

«Suıytylǵan munaı gazyn tutynýdyń kólemi 2021 jyly kúsheıdi. Sebebi 2019 jyldan beri suıytylǵan gazǵa ótkizilgen avtokólikter sany bıyl shamamen 2 ese ósti. Álemdik tájirıbede suıytylǵan gazdyń baǵasy munaı baǵasymen ózara baılanysty. Benzın baǵasynyń 70% paıyzyn quraıdy. Mysaly retinde, AI-92 markaly benzınniń quny lıtrine 182 teńge bolǵan kezde gazdyń naryqtyq quny shamamen lıtrine 127 teńgeni quraýy tıis», - dedi mınıstr.

Eske salsaq, Memleket basshysy Qasym-Jomart Toqaev Twitter-degi suıytylǵan gaz baǵasynan bastalǵan paraqshasynda Jańaózendegi jaǵdaıǵa qatysty jazba jarııalaǵan bolatyn.

«Úkimetke Jańaózendegi jaǵdaıdy ekonomıkalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tıis. Azamattardyń jergilikti jáne ortalyq bılik organdaryna talabyn ashyq aıtýǵa quqyǵy bar, biraq, bul zańǵa, naqtyraq aıtqanda, beıbit sherýler týraly zańǵa sáıkes júzege asyrylýy kerek» delingen jazbada.

Al Mańǵystaý oblysyndaǵy janarmaı stansalarynyń ıeleri suıytylǵan munaı gazynyń qunyn lıtrine 120 teńgeden 85-90 teńgege deıin tómendetý týraly sheshim qabyldaǵany habarlandy.

QR Parlamenti baǵanyń uzaq merzimdi turaqtylyǵyn qamtamasyz etetinin aıtyp, halyqty sabyrǵa shaqyrdy.