Gazdy jer qabatyna keri aıdaý tıimdi – Álıhan Smaıylov

ASTANA. QazAqparat – Gazdy jer qabatyna keri aıdaý tıimdi. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Búginde 80 jer qoınaýyn paıdalanýshynyń ishinde 7 kompanııa jylyna shamamen 18 mlrd tekshe metr gazdy jer qabatyna keri aıdaýdy júzege asyrady. Onyń ishinde barlyq keri aıdalǵan gazdyń 82 paıyzy eki iri munaı-gaz óndirýshi kompanııa - «Qarashyǵanaq Petroleým Opereıtıng B.V.» (11,1 mlrd tekshe metr) jáne «Teńizshevroıl» JShS-ǵa tıesili (3,6 mlrd tekshe metr)», - dep atap ótedi Úkimet basshysy jaýabynda.

Premerdiń málimetinshe, gazdy jer qabatyna keri aıdaý óziniń tıimdiligin kórsetip otyr.

«Júrgizilgen zertteý nátıjesine sáıkes, ken oryndarynda gazdy keri aıdaý óziniń tıimdiligin kórsetip otyr. Munyń ústine gazdy keri aıdaýdy qysqartý munaı óndirýdiń quldyraý qarqynyn arttyrady jáne munaı shyǵarý koeffıtsıentin tómendetedi. Buǵan qosa, taýarlyq gazdyń qosymsha kólemin satýdan túsetin paıda munaı óndirý kóleminiń tómendeýimen baılanysty aıtarlyqtaı ekonomıkalyq shyǵyndy jappaıdy», - dep túsindiredi Álıhan Smaıylov.