Gazdy únemdep paıdalaný jospary ázirlenedi – Energetıka mınıstrligi
«Ekonomıkanyń ósýin eskere otyryp, tabıǵı gazdy ishki tutyný 2020 jylmen salystyrǵanda 2 mlrd tekshe metrden astam kólemge ósti. El ekonomıkasyn gazben qamtamasyz etý maqsatynda Mınıstrlik QazaqGaz jáne QazMunaıGaz kompanııasymen birlesip birqatar sharalar qabyldap jatyr. Birinshiden, gaz óndirýdi yntalandyrý boıynsha zańnamalyq ózgerister qabyldandy. Ekinshiden, Qashaǵan, Qarashyǵanaq ken oryndarynda gaz óńdeý boıynsha jańa zaýyttardy iske asyrý jóninde jumystar júrgizilip jatyr. Osy oraıda bıyldan bastap taýarlyq gaz óndirý kólemi ósedi, sondaı-aq 2025 jyly bul kórsetkish eleýli túrde artady dep josparlanyp otyr», - dedi B. Aqsholaqov.
Onyń aıtýynsha, qol qoıylǵan Jol kartasy aıasynda Gazprommen gaz ımporty boıynsha ýaǵdalastyqqa qol jetkizildi.
«Tutynýshylardyń áleýmettik-ekonomıkalyq jaǵdaıyn eskere otyryp, halyq úshin gaz baǵasyn ustap turý qajet. Alaıda gazdyń tómen baǵasyn tabysy joǵary tutynýshylar da paıdalanyp keledi. Máselen, temperatýra boıynsha 2 esege jýyq aıyrmashylyǵy bar Mańǵystaý jáne Qostanaı oblystarynda tutyný kólemi aıyna orta eseppen 600 tekshe metr gazdy qurap otyr. Osy oraıda gazdyń tómen baǵasyn ustap turý gazdy tıimsiz jaǵý saldaryna ákelip otyr degen qorytyndy jasaýǵa bolady», - dedi mınıstrdiń mindetin atqarýshy.
Bul turǵyda Memleket basshysynyń tapsyrmasyna sáıkes bıylǵy jartyjyldyqtyń aıaǵyna deıin Indýstrııa jáne ınfraqurylymdyq damý ári Ulttyq ekonomıka mınıstrlikterimen birlesip, energııa tıimdiligi men taýarlyq gazdy utymdy tutyný jospary ázirlenetin bolady. Sondaı-aq, Ulttyq ekonomıka mınıstrligimen birlesip, ataýly áleýmettik kómek alatyn otbasylardy qospaǵanda, basqa tutynýshylar úshin gazdy únemdep tutynýdy yntalandyratyn saralanǵan tarıfter tetigi engiziletin bolady.
