Gazdyń kóterme baǵasy ózgeredi – Serik Jumanǵarın
ASTANA. KAZINFORM – Elimizde gazdyń kóterme baǵasyn joǵarylatý qarastyrylyp jatyr. Bul jóninde QR Premer-mınıstriniń orynbasary – Ulttyq ekonomıka mınıstri Serik Jumanǵarın málimdedi.
Onyń sózinshe, Qazaqstandaǵy gaz qorynyń dáleldengen kólemin eskersek, ınvestorlarǵa qazirgideı qun paıda ákelmeıdi.
– Mundaı kóterme baǵa úshin jeke sýbektiler gaz ken oryndaryn ıgerýge barmaıdy. Óıtkeni, olarǵa tıimsiz, - dedi Serik Jumanǵarın.
Onyń aıtýynsha, baǵany ósirýdegi sebep – ınvestorlardy yntalandyrý jáne sol arqyly óndiris kólemin ulǵaıtyp, ishki naryqty qamtamasyz etý.
– Kóterme baǵanyń búgingiden joǵary bolýy salaǵa ınvestorlardy tartady. Sondyqtan bıyl gaz qunyn ósirýge májbúrmiz, - dedi vıtse-premer.
Sonymen birge, ol ishki naryqta jetkiliksiz bolsa, gazdy syrttan ımporttaýǵa týra keletinin atap ótti. Ondaı jaǵdaıda baǵa báribir de qymbattaıdy.
QR Premer-mınıstriniń orynbasary – Ulttyq ekonomıka mınıstriniń málimdeýinshe, energetıkalyq keńestiń sheshimi boıynsha, 1 shildeden bastap gazdyń kóterme baǵasy 33%-ǵa artady. Saldarynan ınflıatsııa 0,16–0,2%-ǵa ósedi.
Bul sharalar uzaq merzimdi energetıkalyq turaqtylyqty qamtamasyz etýge jáne atalǵan sektordy damytýǵa baǵyttalǵan.
Aıta keteıik, buǵan deıin Energetıka mınıstrligi gaz óndirýshi kompanııalarmen 3,5 mlrd teńgelik kelisimshartqa qol qoıǵanyn jazǵanbyz.
Sonymen birge, Úkimet basshysy gaz óndirý qýatyn arttyrý qajet ekenin málimdegen bolatyn.
