Gazdyń aqshasyn áleýmettik ámııan arqyly jeńildikpen tóleýge bolady – pılottyq joba

ASTANA. KAZINFORM – «Áleýmettik ámııan» jobasynda jańa qyzmet paıda boldy. Endi eki óńirdiń turǵyndary gazdyń tólemin jeńildikpen tóleı alady. 

– «Áleýmettik ámııan» jobasyn ázirleýshisi kompanııa mobıldi qosymshanyń fýnktsııasyn keńeıtýde. Endi Shymkent pen Batys Qazaqstan oblysyndaǵy ataýly áleýmettik jáne turǵyn úı kómegin alatyn azamattar gaz tólemin eGov Mobile mobıldi qosymshasyndaǵy «Áleýmettik ámııan» arqyly jeńildikpen tóleı alady. «QazaqGaz Aimaq» AQ-men birlesken pılottyq joba osy jeltoqsanda iske qosylady, - delingen habarlamada.

Jańa qyzmet qalaı jumys isteıdi?

- muqtaj azamattar týraly málimetter «Otbasynyń tsıfrlyq kartasy» júıesinen Áleýmettik ámııan júıesine túsip, taýarlyq gazǵa arnalǵan vaýcherler avtomatty túrde jasalady;

- ataýly jáne turǵyn úı kómegin alýshylar mártebesi bar azamattarǵa jeńildik túrindegi áleýmettik kómek taǵaıyndalǵany týraly 1414 nómirinen SMS habarlamalar jiberiledi; 

- vaýcherdi habardar etý úshin turǵylyqty mekenjaıdyń jeke shotyn qosymshada kórsetý qajet – turǵyn úıge menshik quqyǵy sııaqty qosymsha qujattar talap etilmeıdi. 

Jalpy somadan 24%-ǵa deıin jeńildik jasalaýy múmkin jáne belgilengen normalar sheginde tutynylǵan gaz kólemine qoldanylady. Bul normalar óńirdiń klımattyq jaǵdaıy men turǵyn úıdiń energııa tıimdiligi eskerile otyryp eseptelgen jáne kelesideı mólsherde bekitilgen:

● Shymkent – 631 m³/aıǵa deıin;

● Batys Qazaqstan oblysy – 833 m³/aıǵa deıin.

– Áleýmettik ámııan memlekettik organdarǵa vaýcher qyzmetin paıdalaný týraly turaqty esepter usynady, bul kómek kórsetý protsesiniń ashyqtyǵy men baqylanýyn qamtamasyz etedi. Pılottyq joba shamamen jarty jylǵa sozylady, onyń nátıjeleri boıynsha jobany eldiń basqa óńirlerinde masshtabtaý múmkindigi týraly sheshim qabyldanady. Tolyq aqparat pen beıne nusqaýlyqty 5169 nómirindegi baılanys ortalyǵy arqyly nemese aimaq.kz saıtynda tanysýǵa bolady, - dep túsindirilgen aqparatta. 

Aıta keteıik, Memleket basshysy Qasym-Jomart Toqaev bıylǵy «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda Úkimetke 2025 jyldan bastap «Áleýmettik ámııan» jobasyn tolyq engizýdi tapsyrdy. 

Osy oraıda Kazinform tilshisi áleýmettik ámııan boıynsha Prezıdent tapsyrmasyn oryndaýdaǵy daıyndyq barysyna sholý jasaǵan edi.