Gazdyń 1 lıtri AI-92 benzıni baǵasynyń 70 paıyzyn quraýy qajet – Energetıka mınıstrligi

Gazdyń 1 lıtri AI-92 benzıni baǵasynyń 70 paıyzyn quraýy qajet. Bul týraly Energetıka vıtse-mınıstri Álibek Jamaýov aıtty dep habarlaıdy Kazinform.

«Elimizde suıytylǵan munaı gazynyń baǵasy óte tómen. Dúnıejúzilik standartqa sáıkes, suıytylǵan munaı gazynyń baǵasy AI-92 benzıninen 30 paıyzǵa tómen bolýy tıis. Máselen, AI-92 benzıniniń 1 lıtri 200 teńge bolsa, onda suıytylǵan munaı gazynyń 1 lıtri sonyń 70 paıyzyn quraýy qajet», - dedi vıtse-mınıstr BAQ ókilderine arnalǵan brıfıngte.

Onyń atap ótýinshe, keler jyldyń basynda gazdyń 1 lıtri 5 teńgege kóterilip, kúzge qaraı taǵy da qymbattaıtyn bolady.

«Eger suıytylǵan munaı gazynyń baǵasy dúnıejúzilik standartqa saı bolsa, onda gaz óndirýshiler tabys tabýǵa shyǵady», - dedi Álibek Jamaýov.

Vıtse-mınıstrdiń dereginshe, respýblıkada aı saıyn 130-135 myń tonna gaz óndirilse, tutyný kólemi 140-145 myńdy quraıdy. Tapshylyq 10-15 myń tonna kóleminde tirkeledi.